美國樂壇小天后Taylor Swift上周末一反入行以來的行事作風，首次公開做政治表態，惹來極大迴響。不過Taylor就無有怕，今日於洛杉磯出席第46屆美國音樂頒獎禮(AMA)時心情勁靚，果不然當日贏得四項大獎，不單成為當屆大贏家，更以歷年累計贏得的23個AMA大獎，大破已故天后雲妮候斯頓(Whitney Houston)的得獎紀錄，認真威水！
Taylor Swift在今屆AMA共獲得年度歌手、最受歡迎巡唱、最受歡迎流行／搖滾女歌手及最受歡迎專輯四項大獎，賽前Taylor仲好謙咁話獲獎機會不大，估唔到最後竟贏哂四項大獎，累計歷年在AMA贏得的獎項共23個，超越了雲妮保持的22個大獎紀錄，成為AMA史上獲獎最多的女歌手。而只要將來Taylor再贏一獎就可以平了AMA史上獲獎最多男歌手、米高積遜(Michael Jackson)24個獎的紀錄。睇返Taylor如今仍只有28歲，絕對有大把時間繼續搏殺，未來要贏得個獎絕非難事。
雖然Taylor近排因為打破沉默，公開力撐兩名參與美國中期選舉的民主黨候選人，惹來美國總統特朗普及其大批支持者反擊，不過Taylor似乎無驚過，上台領取年度歌手大獎時，再次公開呼籲美國民眾認得踴躍投票。而不再避開政治話題、變得更敢言的Taylor就似乎相當受粉絲歡迎，雖然有批評者仍質疑佢「虛偽」表態純粹做下樣，不過，等咗咁多年佢終於肯表態，點計都好過繼續沉默吖！
圖片來源：taylorswift@instagram