入行11年嘅無綫藝人李璧琦（Becky），適逢今日（10日）與男友Adrian相識5周年，佢正式宣布：「我要結婚啦！」
Becky透露2007年喺朋友介紹下認識Adrian，但一直都無留意對方嘅存在，後來Adrian展開追求。Becky又表示兩年前嘅男友已向佢求婚，雖然當時已答應咗，但因為對婚姻恐懼同各種掙扎而未舉行婚禮。
今年3月，Becky陪男友到英國，對方準備咗一條寫上Smile嘅頸鏈，向她再求婚，「諗返我哋一齊咁多年嘅甜蜜時刻，由邀請佢返教會到見證佢成為基督徒。大家一齊學習相處之道、互相鼓勵、一起成長，我終於喺佢身上搵返失去咗嘅信心。」二人隨即決定今年七月舉行婚禮。
Becky一直嚮往玻璃教堂嘅寧靜和諧，所以決定去日本沖繩拍婚照：「影相嗰日，太陽、藍天、夕陽都出晒嚟，真係非常興奮同感恩！不過原來藍天之下影相反而仲大挑戰，因為Adrian影唔慣相，攝影師要用唔同技巧捕捉佢睜大眼嘅一刻，同埋我係咁講笑話令佢放鬆同投入。」
除咗拍攝婚紗照，Becky又同男友喺當地製作「愛的紀念品」，「呢兩隻心形玻璃杯係喺我哋第一日到達沖繩，特別安排去玻璃製作工場，親手製造作為紀念，見證這個時刻及作為新居第一對家具，或者⋯…合巹交杯之用？」