《聲夢》演唱會昨晚舉行第二場演唱會，校長譚詠麟同星夢師兄胡鴻鈞（ Hubert）都有入場為一班聲夢學員打氣，二人更突襲後台為大家打氣。校長即場傳授心得，並大派定心丸，「我對所有學員都絕對有信心，佢哋嘅抗壓能力好強，完全唔使擔心，最想留意吓之前教佢哋嘅嘢有冇真係運用到。」
胡鴻鈞昨晚首次與15位聲夢學員見面，「好戥佢哋高興，咁快已經有屬於自己嘅演唱會，大家要 enjoy 好好享受個舞台，係一個寶貴嘅經驗。除咗同 15個學員打氣，當然都支持自己嘅同門柏豪同 JW，希望大家都 good show。」
昨晚第三位導師嘉賓周柏豪首次登場，同黃奕斌 Hugo 合唱了兩首歌「我的宣言」及「甘心替代你」，仲講番大家初見面一個窩心的擁抱，「當時係第一次比一個高大個自己嘅男仔擁抱，個感覺係幾 warm 嘅，Hugo 係一個好簡單好純嘅男仔，佢表現唔好被淘汰嘅時候，居然係擔心連累我，好可愛。」
