莫鎮賢說，「有時數數下，我都唔知自己幾多歲！我成日以為自己四十幾五十歲，我媽咪話，你咩四十幾五十歲呀，如果要講，你係五十幾六十歲喇！」現實是，莫鎮賢過兩年就「登六」，「年齡只係一個數字，我覺得心態最重要。」
至少，眼前58歲的莫鎮賢，外形保持得宜，怎樣看也不似「奔六」人士。由85年參加新秀至今，期間兩度退出樂壇，到今天簽約內地唱片公司，再入錄音室。對上一次出歌，是09年為紀念亡妹而推出的《約定天國》。「今次簽新公司錄唱片過程裏面，我睇到人生自由性，原來好珍貴。我唔想有壓力去做，要切合我依家年齡心態，唔再好似以前，為拍劇而拍劇、為唱歌而唱歌，依家可以沿途享受風光。」
傷痕永遠都在。看透生死，下半場人生如何規劃？「冇得俾你plan太多，由我妹妹死咗之後，我同佢清理賣樓、結束我哋生意，令我體會無論你做咗幾多樣嘢，只要有一日個天要收返你，你乜嘢都唔使做！」明日有明天固然好，活在當下，可能比較實際。莫鎮賢說，沒有什麼是永恆，像他師傅籮記羅文《家變》的歌詞，「變幻原是永恆」。
莫鎮賢說，自己才是真正的「中年好聲音」，「我好多年前已經推動緊呢個concept，好多人話廢青，我話冇廢青；好多人話廢老，我話更加冇廢老，我哋老而不廢！」
這位中年，當年最紅的一首歌叫《情罪》，今天大家不妨再上YouTube重溫一下，真的動人好聲音，經典不用多，一首就夠了。
酒廊兼職認識梅艷芳
莫鎮賢與梅艷芳，真正識於微時。15歲的莫鎮賢，跟父母到尖沙咀美麗華酒店的酒廊聽歌，聽着聽着，變成上台唱歌。莫鎮賢回憶，當時根本不是愛唱歌，也不是發什麼歌星夢，理由只得一個，想賺錢。「我細個好想做律師，因為我爸爸係警察，但好多人誤解咗，我覺得我爸爸都誤解咗，覺得律師死都拗翻生，原來唔係，有一啲比較貧窮嘅人，係冇人為佢哋發聲。我又好鍾意畫畫，想做設計師，我有一個設計夢；後來酒廊老闆打電話叫我去唱歌兼職，幾十蚊唱一set，我記得當時讀中四，個個同學走去做工廠，我又去做一間電鍍廠，但我皮膚敏感好痕抓到損晒。我好嬲自己，因為好想自己賺錢，後來原來我走上台唱歌，都可以賺到錢，而且比佢哋（同學）舒服，相對工錢大啲！」
開始唱酒廊兼職，同行都叫他要留意一對能歌善舞姊妹花，就是梅愛芳、梅艷芳。到82年第一屆新秀，莫鎮賢在電視機畫面，見到當年在酒廊的「依依」，「當時梅姐仲用緊藝名『依依』，呢兩位姐姐大我好幾年，丁屎咁大舞台，每一步、每一個眼神都淋漓盡致，嗰刻開始，我先知道咩叫做舞台。阿梅之後參加新秀，我記得放學返屋企，當時麗的劇集好勁，食飯要同我老竇爭到轉去無綫，睇新秀歌唱大賽。嘩，呢個姐姐變咗明星，第二次俾我有觸電感覺。」
留學日本做捧餐俾人打
適逢當時香港流行日本風，中學畢業後在香港時裝設計學院學藝的莫鎮賢，一心到日本留學，賺多幾份兼職錢然後起行。出發前一年，在83至84年間，先後參加了兩個比賽，一個是《十八區業餘歌唱比賽》、另一個是第二屆新秀，「《十八區》入咗圍，唔知點解我好有自信，自己作咗首好老土嘅歌叫《母親的心意》。我記得一次，有個哥哥走埋嚟話，你識化妝㗎？我話唱夜店就要化妝，唔係要靚，係因為青春期好多暗瘡。」那位哥哥，是當晚贏得冠軍的張學友，莫鎮賢笑說：「我唔知佢記唔記得，我同佢講，要化妝㗎，唔係點遮呀？你啲皮膚都同我差唔多，你都要遮一遮，因為學友都好多暗瘡呀！」以《母親的心意》參賽的莫鎮賢，當晚得了季軍。
到第二屆新秀，莫鎮賢原先以蔡楓華的《倩影》出賽，不過被當時的評判黎小田說服，改以英文歌《Footloose》（《渾身是勁》主題曲）參選，結果一上台腳震忘詞，最終30強止步，於是疊埋心水到日本留學。「去到日本讀書好辛酸，唔夠半年就同人打架，半工讀我去咗間台灣料理做捧餐，各據山頭，老闆請我，點知返咗一日俾人打到返唔到，有日本幫、台灣幫、大陸幫，覺得我爭飯食，香港得我一個，我仲記得間台灣料理喺六本木，我喺嗰度認識籮記（羅文） ，當時佢同張徹太太去玩，係我第一次遇到籮記。」
捧餐不成，莫鎮賢走了去當兼職模特兒，有一晚到卡拉OK唱歌，隨手點了一曲《Love Is Over》中文版（甄妮《再度孤獨》），全場日本朋友震驚，更惹來同場的日本唱片公司人員過來遞卡片，邀莫鎮賢出唱片。「當時覺得，做歌手做藝人好似好容易，十幾歲不知天高地厚。放暑假之前，我哋華星有個保母，我哋都叫佢做『奶媽』，我考第二屆時識佢，一向有聯繫，我去讀書都同我餞行留咗電話。佢打到去日本搵我，佢話，你等等，有人要搵你，跟住電話把聲，原來係梅姐，佢話今屆又開鑼，叫我快啲返嚟參加比賽，讀乜鬼書！佢好老土講咗一句『你係屬於舞台』，因為呢一句，我就返咗去。」
與籮記因《浪淘沙》變師徒
參加85年第四屆新秀，再遇黎小田。上次叫他改唱英文歌，今次呢？莫鎮賢本來打算唱《Careless Whisper》中文版，結果黎小田叫他改唱跳舞快歌，因為同屆的蘇永康已選了《Careless Whisper》，黎小田對莫鎮賢說：「佢唱得好過你！」於是莫鎮賢答：「好啦，我揀日文歌唱啦！」由於當時很多人都說，莫鎮賢外形很像鄉裕美，於是他揀了鄉裕美的《愛の神話》，「其實我偷偷地喺和音作咗一段中文，公司激死，最後都攞到舞台表演獎（最突出台風創新獎）。」
第四屆新秀的金銀銅得主分別為杜德偉、蘇永康和林楚麒，莫鎮賢順利簽約華星旗下，卻苦無出碟機會，很快被派去與王書麒、胡渭康等演出青春劇《高材生》，到了86年有機會和一班新秀與羅文合唱《浪淘沙》，莫鎮賢有幸與籮記變成師徒，「我親近呢位老師，直到佢主動教我，去佢studio練聲，佢又會同你玩，佢一班做時裝嘅朋友又好錫你，佢變咗我一個老師。娛樂圈入面，佢係第二個再同我講咗句『你係屬於舞台』。」
後記：莫老師
莫鎮賢其實多年來有另一個身份，他是歌唱演藝老師，淡出樂壇前後都有不少學生門生，早前適逢30周年，學生們特別為他舉行慶祝音樂會。
莫老師說：「學生話俾我聽，阿Sir不如我哋搞個騷好大意義，你教學30周年，原來我教咗30年。我莫老師呢個身份，追隨住我嘅學生同埋我義工團隊會員，如果佢哋唔放棄我，我會一直run落去。」
人生下半場，好好活在當下。
場地提供：Hermit Cafe & Bar
