碧咸早幾日去完澳門同羅蘭姐拍廣告，噚日已返到倫敦屋企任個女畫花塊面。
碧咸（David Beckham）之所以有「萬人迷」嘅稱號，當然並非浪得虛名，早幾日佢去到澳門拍廣告，仲同拍檔羅蘭合照，令羅蘭開心到暈。碧咸噚日返到倫敦屋企，第一時間做咗么女哈七（Harper Seven）嘅人肉畫板，塊面任佢畫，老婆Victoria即時影相放上Instagram大晒幸福。
碧咸早幾日至好低調咁飛去澳門，為由佢代言嘅酒店拍攝廣告，佢透過社交媒體，公開自己喺澳門拍攝花絮，仲大曬同拍檔羅蘭姐嘅合照，影相嗰陣碧咸攬實羅蘭姐，兩人笑容滿臉，羅蘭姐開心到暈，合作得好愉快。
Victoria自己都畀哈七畫面，仲讚囡囡有創意。
一向疼惜子女嘅碧咸噚日已返到倫敦嘅屋企，老婆Victoria影低6歲么女哈七對住剛剛返到屋企嘅碧咸畫花面貓，照片上仲寫住Daddy’s Home!!Happy Sunday!!（爸爸回家了!! 快樂星期日），可見哈七好掛住Daddy，碧咸亦好錫個女畀佢任畫，個樣非常enjoy。
連Victoria自己都畀哈七畫面，佢仲話囡囡要將媽咪變成emoji cat，覺得佢非常有創意。
撰文：安東尼奧
圖片來源：David Beckham、Victoria@Instagram