相信睇咗《職業特工隊:叛逆之謎》的觀眾,都會覺得湯告魯斯真係好鬼癲!年屆56歲的靚佬湯在片中攀岩、飄移飛車、爬直昇機、跳樓、高空軍事跳傘、喪打,全部危險動作一鏡直落,做動作同時仲可以演戲,真係令人佩服到五體投地。點知《The Late Late Show with James Corden》的美國名嘴James Corden就好「沙塵」咁話,靚佬湯在片中跳傘一幕屬小兒科,引來靚佬湯決定親自帶Corden跳一次,雖然有靚佬湯同教練陪住,但Corden喺過程中驚到腳震爆粗,仲有幾次想逃走,表現超爆笑!
先介紹少少Corden說的那幕「高空軍事跳傘」,平時係由軍事人員執行,他們會由二萬五千英尺高空跳下,並在海拔低於二千英尺的地方打開降傘,整組動作難度極高,不過靚佬湯秉承一貫的博命態度,為了這一幕主動接受長時間訓練,一日跳五次,總共跳了超過一百次的演習。
今次同Corden跳傘,靚佬湯體貼地減低難度,計劃由一萬五千英尺高空跳落去,但這個高度已經嚇到Corden想縮沙,猛話前幾日已經狂發訊息畀靚佬湯,扮自己食物中毒想取消跳傘,點知搞錯電話,發錯訊息給一樣叫Tom的「邪神洛基」湯希丹斯頓喎。臨開始前Corden有幾次想逃走,都被體能fit到爆的靚佬湯捉返嚟,幾經「糾纏」,Corden接受了一點基礎訓練,然後二人就齊齊上機。
剛上機時,Corden還可以跟靚佬湯唱《職業特工隊》主題曲,又開玩笑打俾老婆交代身後事,但當飛機再上升,Corden已經嚇到不敢亂動,又索性閉眼在機上,Corden嚇到不敢亂動,又索性閉眼,不過拖延了一陣子,他終於在教練陪同下「被跳」出去!而表現從容的靚佬湯就自己一個跳落去,全程笑笑口好鬼輕鬆,除了找Corden擊掌,更貪玩做了幾下花式動作,勁到咁,點夠佢玩?
影片來源:The Late Late Show with James Corden