【連周杰倫都Share】網絡紅人惡搞大媽版〈等你下課〉

台灣天王周杰倫每次出新歌都有唔少人翻唱同改編，估唔到最近有網絡紅人將〈等你下課〉呢首青澀情歌二次創作成大媽版，仲鼓勵網民分享呢首歌俾各位大媽聽添，而最令人喜出望外嘅係連原唱周杰倫睇完之後都有開心Share呢！

網紅308樂團將〈等你下課〉改編成七、八十年代的大媽風格，不但只配樂用上懷舊風，連MV都跟足舊時嘅低清製作。從片段可見，畫面同歌詞內容冇直接關係，主要都係影下風景，鯉魚等等，再加埋老套到世界盡頭嘅挨石唱歌，剩睇畫面陣大媽味都出晒嚟。而佢哋亦係段片上面寫：「媽媽問：周杰倫為什麼那麼久都沒出新歌了，續〈菊花台〉就沒聽見有新歌了。以表孝順，我們就做了這〈等你下課1974〉版本大家可以分享給自己的媽媽，外婆，表姨，愛唱歌的姨丈，隔壁家老王，你辦公室樓下的收銀員小姐，周杰倫等等…分享此影片，與對方必增加友好度 +50。」

原唱周杰倫睇完呢段片之後，都忍唔住手幫佢哋Share，仲留言話：「看你這麼孝順，就幫你轉發一下。」而網民睇見偶像分享呢段片，仲提議話不如搵費玉清翻唱添。