苑瓊丹（苑仔）為香港開電視拍攝《開工大吉77》，節目將於周日（17日）首播，第一集苑仔以身穿西裝上陣，化身黑超特工大爆「片場藝人飲食習慣」：「其實我都係聽片場手足話比我知，佢哋讚古天樂係好演員，因為唔想劇務手足周圍幫佢搵嘢食，所以次次都係叫星洲炒米，貪度度都有得買夠方便！而秋官好多時都會叫腸粉食，夠飽肚之餘又冇汁，唔會整污糟件衫，所以好多劇務手足最鍾意同佢哋開工。」
苑仔還和製作團隊寓工作於娛樂，拍攝期間大家打成一片：「佢地成日挑戰我架，食Lunch無啦啦同我鬥快食，我地會將呢啲拍成片尾花絮！隊Crew仲癲到陪我拍直播片唱歌伴舞，所以每次開工都玩到癲，用晒體力之後，收工返屋企要大覺瞓！」