九八年度港姐季軍阿Nat吳文忻 （現改名吳忻熹 Nathaliie），上周於《明周》公開乳癌復發第三期，並擴散至淋巴腺後，積極面對治療，全城齊齊為她打氣。
本周Nathaliie做第三次化療，原來她選擇於公立醫院接受治療，阿Nat亦不忘拍片與《明周》讀者和同路人分享，她說︰「依家去緊睇醫生，做第三次化療，上星期做完第二次就好攰好攰，今次吊紫杉醇（化療藥物）一隻，大概吊個半鐘左右，但今日把聲好咗好多，唔知係咪因為開始吸氫氣，減低對化療副作用，吸完個人精神啲，講嘢冇乜氣喘。」
早上到達醫院，直到下午才開始有針吊，「實不相瞞，其實我依家做化療係喺瑪麗公立嗰邊，唔好以為藝人一定去私家，我覺得做吊針都可以公立嘅，因為都係嗰啲藥，香港居民其實都好好，化療有政府support啦，但因為我是三陰性乳癌，係乳癌之中最惡、復發率最高的一種，所以就一定要做手術後嘅免疫治療，但政府就唔cover，免疫治療大概三萬尾至四萬蚊一針左右，前八針、加手術後九針，所以其實都幾貴，所以我就選擇化療和免疫治療都一齊喺公立做，免疫治療費用就自己俾，保險cover唔晒，但原來香港的乳癌基金，對乳癌三期病人的免疫治療有三份一贊助，我都有申請。」
阿Nat續說︰「每次都要等好耐，都預要搞成日，不過政府有個App叫HA Go，方便好多，可以喺上面預約快少少，預早兩個鐘約就唔使親身排隊，唔使到場填預約紙，因為等嘅時候同姑娘熟咗教我，所有記得等嘅時候都唔好嘥時間，多啲問，同姑娘熟啲都有著數，不過醫院真係好多病人，有時見到佢哋都好辛苦，我慣咗等，以前拍嘢大部分時間都等埋位，依家都係等。」繼續打仗！
