九八年度港姐季軍吳文忻 （現改名吳忻熹 Nathaliie），早前於《明周》公開乳癌復發第三期，並擴散至淋巴腺後，積極面對治療，全城齊齊為她打氣。
選擇於公立醫院接受治療的Nathaliie，已經完成第三次化療，自公開病情後，各界好友紛紛送上祝福，Nathaliie亦收到很多新進治療方法，集合各方面意見和做足資料搜集，Nathaliie亦有意嘗試另一種治療癌症的方法，她說待日後才跟大家分享。
而經過三次化療後，一如她所料出現脫髮情況，一早有心理準備的Nathaliie，本周找來兩位女兒Scarlet和Season做髮型師替她剷光頭。
Nathaliie說︰「十個癌症病人，有十個都擔心化療會變光頭，或者好怕同人交代，又驚身邊嘅人點睇，好多呢啲擔心會變咗好負面，我當初其實係諗，點都要剃㗎啦，都開始甩，我會想邊個幫我剃呢？我第一就就諗到大女和細女，由細到大都係我幫佢哋剪髮，而家佢哋有機會幫媽咪，甚至乎剃頭喎，我諗佢地長大後係一件好難忘嘅事，同埋變咗一件親子嘅事，亦都好positive。」
起初Nathaliie都擔心女兒的心理狀況，不過這段時間她們都逐漸接受，亦選擇與媽咪一起面對，只有十一歲的Scarlet和八歲的Season剪髮當然沒有技巧，但十分顧及貪靚媽咪感受，一邊剪一邊會問媽咪︰「You ok？」大女更大讚Nathaliie︰「You look great！」
Nathaliie續說︰「剃頭嘅過程入面，佢哋都幾開心嘅，細女仲話想同我一齊剃，想陪我，好有義氣，但我當然我唔捨得，我發覺當你遇到難關正面面對時，正能量都會pass到身邊的人，原來之前擔心嘅嘢都係自尋煩惱。」
完成一刻，Nathaliie都很滿意自己的頭形，「剷晒嗰一刻照下鏡，原來我頭形都幾靚，都幾有型，我直頭覺得好似啲荷李活明星咁，自信心返晒嚟，凡事係兩面睇，尤其經過今次剃頭，以前成日覺得自己把頭髮又乾又旱，好難打理，而家覺得冇晒啲煩惱，原來光頭都幾爽，感覺好似變返嬰兒咁，有一種好似好重生嘅機會咁。」
