98年度港姐季軍吳文忻 （現改名吳忻熹 Nathaliie），早前於《明周》公開乳癌復發第三期，並擴散至淋巴腺後，積極面對治療，全城齊齊為她打氣。
最初選擇於公立醫院接受治療的Nathaliie，已經完成第三次化療，自公開病情後，各界好友紛紛送上祝福，Nathaliie亦收到很多新進治療方法，集合各方面意見和做足資料搜集，Nathaliie決定嘗試另一種治療癌症的方法，Nathaliie說︰「最近其實就做咗個決定，轉一個治療方式，嚟緊會飛去曼谷做一個叫做細胞治療Cell Therapy，點解會有呢個決定呢？其實自從報道出街之後，好感恩，好多認識和唔認識嘅朋友都send咗好多治療方法俾我去參考，我亦都一一上網做過research，咁啱亦有朋友做過呢個細胞治療而又成功咗，我都睇咗好多clinical report啦，做個research又網上study過之後，覺得呢個細胞治療會好適合我，所以就選擇咗去做。」
Nathaliie補充︰「我覺得癌症唔代表只得一個治療方式，有其他alternative方法，但最緊要自己research多啲，最好就係有reference、有referral，如果有成功個案，就更加會有信心，同埋最緊要最緊要係，揀一個你自己believe並適合你嘅治療方法，因為每個人都唔同，如果你相信嗰樣嘢係幫到你嘅，我相信會係事半功倍。」
本周一（16日），Nathaliie與多年好友李樂詩Joyce見面，兩人午餐後到淺水灣赤腳散步，Nathaliie說這是自然療法的一種，把身體不好的東西傳送出去，「呢個叫做Earthing and Grounding，踩踏沙灘，就是把不好的能量或氣經過腳底落地，其實也是自然治療的一種。」雖然Nathaliie和Joyce分別是歌手和演員，但原來兩人識於微時，Nathaliie說︰「我們2008年在美國拉斯維加斯登台認識，我做司儀、佢唱歌，Joyce就名副其實鬼妹仔，我就半桶水鬼妹，兩個性格好相似，雖然大家唔係經常見面，但一見面都會講唔停，我結婚的時候好少邀請圈內人，但就有邀請Joyce。」
Joyce亦是過來人，曾經於2021年患乳癌並切除兩邊乳房保命，Nathaliie一見到Joyce就說︰「好開心，你現在康復了，現在輪到我。」Joyce得知Nathaliie的情況後說︰「你真的要照顧好自己。」Joyce亦給予Nathaliie很多支持和意見，Joyce說︰「我康復後的調理方法比較自然，做多點運動，因為做運動是很有幫助，游水行山，但最重要的是心情，愛惜自己多一點，不要影響自己的心情，呼吸多一點大自然空氣，我會經常唱歌，我覺得其實甚麼事都源於自己，開心不開心其實都是自己選擇，是有得選擇的，所以盡量令自己每日都開心啲。」
中秋節當晚，Nathaliie與兩個囡囡一起玩燈籠過節，Nathaliie說︰「其實同Joyce都傾咗好耐，佢最初知道嘅時候，其實都淨係睇咗一個醫生，咁我都建議同路人，知道自己有癌症嘅時候唔好慌，雖然一定係驚，但我建議睇多幾個醫生，因為唔同醫生講嘅嘢都唔同，我嗰時都睇咗幾個醫生，講嘅嘢都唔同，同埋我覺得最緊要係，其實癌症唔會話係幾日內或者一個禮拜、幾個禮拜就會急轉直下，除非你真係已經好後期，咁係有少少時間，一定可以去做research、問多啲人，因為通常一有癌症，大家都會唔想講俾人聽，我嗰陣時都係，所以一路就係自己上網搵，但係報道出咗街之後，真係好感恩，可能自己以前都係藝人身份，所以多咗好多回應，亦都多咗好多機會，係我之前上網搵都搵唔到嘅，或者係我搵完都唔知係咩，之後發現原來有咁多朋友，之前都試過其他唔同類型治療方法，我就多咗好多reference，所以我建議大家，最緊要做多啲research，揀一個適合你自己嘅治療。」
‧片段嘉賓言論純屬個人意見 並不代表本刊立場
