98年度港姐季軍吳文忻（現改名吳忻熹Nathaliie），早前於《明周》公開乳癌復發第三期，並擴散至淋巴腺後，積極面對治療。
阿Nat在香港接受三次化療後，決定接受新治療方法，去年八月已赴泰國進行「免疫細胞治療」，第一次報告，左胸腫瘤縮小了一半，阿Nat對報告感到amazing；日前阿Nat已到泰國進行最後一次「免疫細胞治療」，正等待報告以應對之後的治療方案。
趁這段時間，阿Nat一早計劃帶兩個囡囡去北海道滑雪，但竟遇上從未試過的坐骨神經痛，不過，這次旅程亦令她有新啟發和領悟。
阿Nat說︰「呢個二世古滑雪trip，已經plan咗幾個月，諗住一個人帶兩個女冇問題，因為以前試過一拖五添！但去到竟然坐骨神經痛，可能近排真係太勞累，先係細女生日，做媽咪都知搞一個生日會都幾攰，之後又去咗海洋公園睇熊貓，咁就順便同佢哋玩埋機動遊戲，但一玩就痛到喊！」
自小是運動健將的阿Nat，原本諗住自己頂得住，「諗住玩唔到snowboard，咁玩ski容易啲，點知第一日食止痛藥都搞唔掂，好好彩，因為今次住喺朋友屋企，又有另一個舊同學一家一齊，佢哋有三個小朋友，一早book咗滑雪教練，兩個女就可以join埋一齊，又因為咁依家多咗幾日me time，去咗附近一個溫泉，望住個天，發現原來一切都係最好安排，原來個天都知道呢個媽媽攰喇，要休息吓，做一啲運動，因為坐骨神經痛，真係都要靠自己做運動，令啲肌肉推返上去，唔好再壓住啲神經，依家recover好多了！」
阿Nat因為Sammi鄭秀文重奪叱咤「我最喜愛女歌手」，被對方的感言︰「只要有勇氣，一直向着目標進發，目標就會實現。」令她有所啟發，打算出歌一圓自己入行前的夢，所以今次自駕遊亦有Sammi的歌曲陪伴，更得到Sammi留言支持她出歌，阿Nat說︰「今次日本自駕，一直播住Sammi嘅歌，佢真係我偶像，好開心佢仲喺IG留言支持，我開心到瞓唔着覺，雖然我哋唔認識，但佢俾勇氣我追夢！」
