【韓劇推介】《為你心動》「戀愛腦」吸血殭屍爆笑點

睇吸血殭屍片，唔一定係驚慄，好似這齣由玉澤演參演的《為你心動》，就笑點滿滿；首先，編劇顛覆了大家對吸血殭屍片的印象，因為現世代周街都有CCTV，所以他們不可以隨便天上飛，想吸血又唔可以隨便搵個人，要去黑市買血……於是乎現世代的吸血鬼都要打工賺錢。

哈哈！冇咗殭屍牙的玉澤演，今次真係怕你有牙！

+25

未變成人類，但又不是純種殭屍，會對女主角心動嗎？

睇了兩集，有幾個位真係笑咗出來，好似有場戲講玉澤演飾演四百幾歲的吸血殭屍宣于血，瞓了山楂木棺材一百年只求變成人類，但只差一日，被看管殭屍大宅第四代傳人元志安飾演的朱仁楷意外開棺，玉澤演變了唔係人又唔係純種吸血殭屍，嬲嬲豬下想咬元志安，點知俾元志安反咬，這一幕真係拍得幾搞笑！

瞓了九十九年三百六十四日重見天日，玉澤演這隻吸血鬼依然追求物質，亂買衫。

為了證明自己係吸血殭屍，要在元志安面前伸出獠牙，想飛天又想做大力士，點知因為百年冇吸過血冇料到，尷尬到爆的場口又令觀眾笑了；又有一場想找「貓仙」，玉澤演被街坊誤會他恰流浪貓，被狂鬧變態，百分百喜劇感。

今時唔同往日，有血飲，真係要講聲多謝。

其實《為你心動》條橋好簡單，就係男人想談戀愛，沒有心跳的吸血殭屍想變成人類，嘗嘗心動感覺；戀愛腦的吸血殭屍在現世代甦醒後，遇上生活艱難，對任何事都沒有反應，只求生存的元志安後，兩人同居後生活的甜蜜故事。

由男團2pm出道的玉澤演，近年主打拍劇，好似《打架吧鬼神君》、《御史與祚怡》及在《黑道律師文森佐》飾演奸角張漢碩，角色多變亦給觀眾留下深刻印象，今次演吸血殭屍亦有自己一套，自信十足兼且自以為靚爆鏡的人設，都盞鬼！

朝鮮年代，尹邵熙為救玉澤演被吸血鬼獵人殺害，二人鬼馬地扮加害者及受害者。

《為你心動》

KBS2 逢周一、二晚上10:30播映