記唔記得無綫八年前曾有一齣電視劇《鐵馬戰車》，男主角係黃德斌女主角係唐詩詠，劇集講交通警員日常處理的交通事故，原來唔係咁簡單，意外可能唔係意外，係人為，當年劇集收視都好好。
而韓國都好多警匪劇，不過以交通部門為主幹的，原來《碰撞搜查線》係第一個，這劇由《模範計程車》的導演朴俊宇執導，劇情講在交通部如隱形的交通犯罪調查組，在毫無後台下追查犯罪者的惡行；男主角是剛拍完《奇案摸摸查》的李民基，女主角則是《機智醫生的生活》做曹正奭妹妹的郭善英，對上一部劇則在《Moving異能》做柳承龍老婆；兩位都是戲骨，睇第一集已經好有火花，加上故事內容講借交通意外殺人騙保險的欺詐案，橋段幾有新意；本來做保險調查員的李民基，完成欺詐調查後決心加入警隊，而鏡頭又顯示他到太太的靈前後，跟原來是刑警的岳父透露自己要考警察，相信埋下了一條暗線。
而李民基加入交通犯罪調查組後，第一宗案件的嫌疑人竟然是「女鬼」，組員為了查探道路發生交通意外的真相，直接偽裝成為受害者潛入……李民基在劇中憑着出色的分析能力及推理，協助隊員破解交通蠱惑事故，破案率成為王牌隊伍。
看這劇時，有一點幾得意，就是萬年壞人許城泰飾演調查組的組長，而專做黑社會打手的李浩哲則是警察，有少少唔慣囉！
《碰撞搜查線》
Disney+逢周一、二晚上10:30播映
