今年的萬聖節檔期，許多鬼片輪住上映，有號稱最驚嚇的《詭修女》(The Nun)，亦有重拍經典的《月光光心慌慌》(Halloween)等等。對於心血少的觀眾，驚嚇程度僅屬「十小嚇」的《書中自有魔怪谷2：翻生萬聖節》(Goosebumps 2: Haunted Halloween)亦是不俗的應節佳品，電影日前就發布了最新版本預告，一齊嚟睇吓啱唔啱心水？
《書中自有魔怪谷》系列改編自RL Stine所著的同名經典童書系列，第一集在2015年上映，講一個中學生意外地把童話書裏的一堆怪獸釋放出來，為免怪物橫行，幾個學生只好冒生命危險，把怪物逐隻捉回。帶領班後生仔捉怪獸的諧星Jack Black表現惹笑，幾個新演員亦精靈鬼馬，加上故事的魔幻前設亦令人想起《逃出魔幻紀》，所以首集一上映即登上票房冠軍，全球票房達1.5憶美元，成績不俗。
電影乘勢追擊，將於今年10月30日推出續集，換上全新班底，包括《逃出魔幻紀：叢林挑機》新進女演員Madison Iseman、《小丑回魂》得意肥仔Jeremy Ray Taylor同黑人演員Caleel Harris。雖然今集無咗Jack Black，不過Madison同Jeremy潛力不俗，過往的演出表現出眾，甚至成為電影亮點，今次擔大旗甚有看頭，加上魔怪首領、陰陰濕濕的木偶Slappy繼續出場，睇佢點樣領導一班怪獸玩班後生仔(或者被玩轉頭)，都應該幾好笑！
圖片、影片來源：Sony Pictures HK