上月中《歡樂今宵》舉行聯歡晚宴，很多久違了的老友記聚首一堂，那張全體大合照，很重要。魏綺清特別由加拿大返港，她說，上一次出席是16年聚會，兩次都是擔任晚會司儀，「其實係想同啲舊同事見下面，我好鍾意修哥（胡楓），我成日都同佢WhatsApp，希望趁機會見下佢老人家。」魏綺清說，很多人都不在了，像譚炳文、余子明，「連祝文君都走咗！」
今年56歲的魏綺清，闊別熒幕多年，想當年中學畢業已被發掘當模特兒，之後考入商台做DJ，一頭長髮配上兩個可愛小酒窩，有電台「白兔仔」綽號。成為明星DJ後，出碟出書拍劇拍電影撈埋電視主持，卻忽然在94年移民加拿大，魏綺清說是「隱居」，在小鎮過着平靜安穩的人妻人母生活，每日像活在動物園，火雞、土狼、浣熊老是常出現。
在加國照顧家庭之餘，魏綺清亦在電台開咪，到了20年初，她原先打算退休，因為一個疫情，令她想留住一把聲音，做多一點，「同事都退晒休，我啲年紀都應該退，點知疫情開始，我聽到聽眾打電話嚟喊，嗰時未有疫苗，成家人中晒，唔知點算好！」於是魏綺清找了不少藝人朋友錄音打氣，「好似羅蘭姐話，總會打贏佢！」這次返來，月底又回去，不過魏綺清說，正有回流香港計劃，「呢度話晒都係自己成長地方，以前我走，因為我覺得二十幾歲，去另外一個地方，開始另外一個生活，我要build up自己家庭，依家差唔多過一段落，我可以返番嚟，做一啲貢獻社會事，唔係話要搵錢，我意思係可以將幫加拿大華人嘅心，都可以返嚟做一啲嘢！」她說：「我賣緊樓㗎喇嗰邊！」
由打算退休到計劃回流，或多或少都與這一年間，魏綺清經歷了多位身邊親友的離開，其中她的姊夫、胞兄和母親都在一年間先後告別。喪親之痛的魏綺清，生活仍得繼續，覺得時日無多，想再做多一點點。
「白兔仔」都有傷心時，當年賣牙膏廣告「鹹得有道理」的魏綺清，嘗過五味人生，不只鹹，甜苦都有道理。
移民加拿大過隱居生活
廣播道五台山上的商台港台，魏綺清都做過，「紅得太快，節目受歡迎，跟住有碟出又拍電影，第一套同張曼玉拍《摩登仙履奇緣》，陸續都有戲拍。我一直覺得係啲工嚟搵我，我心態係打工，只不過打唔同類型嘅工，突然有間出版社叫我寫書，我嘭一聲又寫咗幾本書。」到了94年，魏綺清跟家人移民加拿大，「其實我爸爸一路都話搞移民，我哋屋企人全部去晒嗰個埠仔，所以我跟大隊，成條街姐姐呢度、細妹呢度、哥哥嗰度！我做到94年離開咗港台，派晒餅之後，同事仲送咗禮物俾我。94至97年我都有返香港好密，因為我父母有病，到97年我父親過咗身，我帶埋啲骨灰過去加拿大，好長時間冇再返過嚟。」
到加拿大的頭十年，魏綺清形容為「隱居」，「我匿埋咗十年，隱居咗十年，我覺得嗰十年入面，我好似去咗一間大學學嘢，學咩呢？學剪草、學剷雪、學揸電鑽、洗泳池、𢳂樹葉，喺香港發夢都冇諗過會識做，我覺得好似去咗一間社會大學。去到加拿大，我住嘅地方因為係鎮仔（奧克維爾），成日都見到好多動物，突然間門口會有六隻大火雞行過，我又追追追同佢哋影相，有時啲coyote土狼會攻擊人，我即刻攬住啲狗仔拚命跑，呢啲生活情趣，香港冇機會遇到。」
在加拿大的歲月，魏綺清完全沒有懷念香港娛樂圈的日子，「我匿埋咗十年，完全冇人知我喺加拿大住，我住喺一個冇唐人嘅地方。直到有一次，胡啟榮帶埋盧業瑂、雷有曜喺多倫多downtown開演唱會，我揸車出去睇，第二日幾個電台打嚟，問我可唔可以幫手，有一個台就話啲DJ走晒，過嚟幫下手，所以嗰邊啲台我都做勻！」
聽眾粉絲跳樓自殺
魏綺清有個幸福家庭，移民加國前，她在香港已經與圈外男友結婚。老公十分低調從未在鏡頭前曝光，「我哋喺香港結婚，好細個已經識，大家都係街坊，佢完全唔係做呢一行。」婚後兩人育有一子三女，四子女早已大學畢業出身，有做核數師、有做生意。魏綺清常說家庭成員有五位小朋友，包括愛犬，「我有五個家庭成員，四個小朋友加一隻狗，後來隻狗走咗。我有一樣嘢好開心，我啲小朋友從來冇遲到過，其實小朋友遲到，係媽咪責任，佢哋七點鐘上堂，最遲七點三打鐘，你唔夠easy，踢佢起身俾佢食早餐，女仔就紮辮着校服，你唔整好晒所有嘢，佢哋就出唔到門口，出唔到門就會遲到，咁多年佢哋冇遲到過，我好proud of呢樣嘢。我係crazy Mom癲癲哋好緊張，所以嗰時見家長就話，你啲小朋友手腳好快，做嘢好急，我話因為似我囉！」
仔大女大本應樂得清閒，不過魏綺清去年面對生離死別，除了親人離世，還有一個粉絲變朋友的聽眾，令她耿耿於懷，「今年七月我媽媽走咗，呢啲都係人生經歷，過去呢一段我離開咗香港嘅時間，見到好多嘢、學到好多嘢、經歷好多嘢。2022年，我有七個朋友走咗，唔係因為COVID而係各種原因，最傷感有一個好後生男仔，佢細細個開始聽我做節目，聽聽下做咗朋友，雖然我喺嗰邊，我哋成日都會WhatsApp，返嚟都會見面帶佢去行山，幾個fans一齊。我去年五、六月打俾佢，電話一路冇人聽，我覺得好奇怪，到九月終於有人聽，把聲同佢好似，但我知道唔係佢，佢話我聽，我阿哥走咗，跳落嚟走咗，二十六樓！我個心好唔舒服，我知道佢有抑鬱症，其實我可以幫佢多啲，但礙於時間，我醒嘅時候佢瞓緊，其實我可以伸隻手去救一救。佢好乖，以前喺銅鑼灣某間酒店做整餅，佢會整啲拎來電台俾我！我覺得人生可以好化學！」
姊夫胞兄母親先後離世
還有，去年至今一內年，魏綺清的胞兄、姊夫與母親先後離世，「我媽媽走咗之後，我突然覺得自己時間唔係好多，點解呢？因為我都有家族遺傳病（多囊性腎病），但我唔諗，我覺得自己時間唔係好多，我覺得我應該要拎啲時間，去回饋社會做返啲嘢，所以我做電台亦都幫加拿大腎臟基金籌款，出咗六張籌款唱片。」
媽媽離世，令魏綺清有回流香港計劃，「媽媽94歲，身體慢慢慢慢就停，我覺得我可以做好啲，佢試過喺我屋企住一段時間，我哥哥亦都係，我哥哥去年11月突然間走咗。屋企人離開其實個心好唔舒服，我同自己講，唔好唔開心，即使我依家好唔開心，我生活都要繼續，我唔可以繼續愁眉苦面，一路喊冇用，所以我返嚟香港，我媽媽後事辦完，我返嚟見下啲朋友，等自己換一個心情，然後再重新出發。好似我有個朋友，佢又靚又年輕又健康過我，我成日病、佢都唔會病，突然間就話cancer走，我好唔捨得。所以我成日話，依家真係要活在當下，好好enjoy自己人生，眼前人要好好珍惜。」
換一個心情重新出發，打算重返幕前？魏綺清笑說：「咁嘅年紀仲拍劇呀？我驚捱唔住！同我同期應該都退晒休啦，我都係要做阿婆角色！我冇諗過，以前我喺無綫都唔係拍過好多劇，我主要做司儀主持，所以我冇諗過返嚟要搵工，唔緊要啦，有人肯養，咪唔使去搵工囉！」魏綺清的確有老公養唔使愁，訪問前一晚「小犬」襲港九號波，正是魏綺清與老公結婚35周年紀念，打風打亂飯局，惟有訪問後趕住慶祝。
後記：
郭富城
魏綺清是明星DJ，最當紅的年代更出碟做埋歌星，87年推出EP《初戀故事》，翌年再推出大碟《尋夢園》。《初戀故事》內的一曲《戀愛密探》，MV男主角是郭富城。
拍MV前，魏綺清已和城城拍過廣告，「我好早期同佢拍過報紙廣告，我唔係main talent，佢都唔係，我哋兩個做伴舞，有人嚟教我哋跳舞，嗰時我有跟吳景麗學緊跳舞，所以我pick up得快啲，於是我教返大家，我教郭富城加埋羅慧娟。第一次見佢，我覺得呢個男仔好犀利，跳舞好快，佢pick up得好快，及後冇見咁多年，到拍呢個MV嘅時候，佢已經完全超越晒，係一個專業舞蹈員。我覺得每個人，成長路線都唔同，之後佢隻歌《我是不是該安靜的走開》，我嗰時喺電台成日都有播。」
場地提供：Arcadia
