麥翠嫻當年是亞視花旦，依家復出被封為「史前花旦」，對呢個新封號佢話﹕「嘩！正呀，難得有呢個封號我都好Surprise，『史前花旦』唔係個個做得到，難得大家記得我係亞視花旦，證明我在大家心目中仲有個地位，真係好開心！其實我亞視、無綫都做過，不過大家可能對我做亞視花旦的印象比較深刻，我唔介意大家叫我『史前花旦』，我叫麥翠嫻，大家繼續記住我啦！」
麥翠嫻最近同亞視一班老友記，合作搞了一套歌舞劇《我是過來人之南北一家親》，麥翠嫻事事親力親為叫朋友捧場，話呢套劇大家又唱又跳非常搞笑，佢做「寶珠」同「奇哥」甄志強好多對手戲，如果睇開亞視的觀眾一定會鍾意；麥翠嫻話囝囝在瑞士讀酒店管理，最近返香港做實習，一知道媽咪做舞台劇，已經第一時間話要幫手錄影，阿囡大學畢業早前返香港，在銀行做金融工作，兩姊弟對藝術有興趣，但對娛樂圈就冇興趣，所以一定唔會做「星二代」。
麥翠嫻以前做花旦，現在復出變咗台柱經常被邀登台演唱，「舊年朋友問我有冇興趣開演唱會，當時嚇咗一跳，冇諗過有人叫我唱歌，朋友話美加個邊有好多華僑，好鍾意睇番以前的藝人，當時抱住挑戰的心態，準備咗二十幾首梅艷芳和小鳳姐的歌，結果觀眾熱情到不得了，開五場演唱會反應好熱烈。」麥翠嫻透露負安排登台的經理人，稍後會到香港看他們的歌舞劇，希望大家的演出可以吸引對方，到時安排多些藝人一齊去登台就皆大歡喜；呢套劇除咗嫻姐麥翠嫻、區靄玲外，仲有久違的小強甄志強、王薇、黃樹棠、陳植森、傅晉杰、張加慧同埋十一哥何國材。