《韓索羅：星球大戰外傳》（Solo：A Star Wars Story）昨日已正式上映，香港超人氣同超正氣樂隊Supper Moment前晚喺Facebook放咗段片，拍下佢哋睇完《韓索羅》之後嘅觀後感，仲將正能量勵志代表歌《一樣不一樣》改歌詞jam成《不一樣的英雄: Han Solo》向韓索羅致敬，主音Sunny仲迷上片中的女主角、人稱「龍母」的Emilia Clake，不過幾位成員講Han Solo英文都好唔一致，甚至讀成「慳」 Solo，十分搞笑!
將快紅館開騷的Supper Moment將首《一樣不一樣》改歌詞，jam成《不一樣的英雄: Han Solo》，引來粉絲好評，有網民留言：「好正，好好聽呀!」、「可以做電影既廣東版主題曲，聽完好想去睇部戲啊！」更有留言話：「唔知喺紅館可唔可以唱呢個版本呢？
話說喺條片鼓手阿達話帶三位隊友睇完《韓索羅：星球大戰外傳》（Solo：A Star Wars Story），佢話：「我哋四個，有啲似佢哋主角組隊成軍嗰種feel。」
低音結他手CK話：「我覺得睇住佢哋一個個咁入team，真係好過癮喎!」
主音Sunny就大讚喺美劇《權力遊戲》飾演「龍母」的女主角Emilia Clake，「唔係龍五喎，係龍母，雖然佢係媽媽，但係佢又靚，又有頭腦，又感性性感喇，有幾幕我都幻想自己好似Han Solo咁樣，同佢出雙入對，出生入死，出入平安!」
結他手阿雞就講笑話：「Han(慳) Solo就無喇，慳啲你就有!」
片段中幾位成員講Han Solo英文都好唔一致，有人讀「Hand」Solo、有人讀成「慳」 Solo，原來原版《星戰》戲入面都出現讀音唔一致嘅問題，有時叫佢做「Hand」Solo、有時又叫咗佢「Hon」Solo，有影迷仲剪埋片放上YouTube比較邊個讀音喺戲中用得最多。不過，睇返今集《韓索羅》，大部份演員都係講「慳」Solo，阿雞又真係冇講錯。
撰文：安東尼奧
圖片來源：互聯網、Supper Moment@Facebook