方力申昨日（5日）展開「香港環島游45公里慈善挑戰」，為完成創舉，小方連月來密密操練。不少圈中朋友均鼎力支持小方，而古巨基更身體力行在凌晨時分到小方家中，接他出戰環島游，給予最大鼓勵！
小方感激基仔仗義幫忙，「基仔除咗捐錢、問候我、接載我、接濟我，仲幫我籌埋錢，籌埋錢呢個先最難啊嘛，知唔知我面皮幾薄啊？但基仔幫我籌錢！」
基仔續問道還有什麼能幫忙，小方笑指：「你知啦游12個鐘，要曝曬，有啲位我又掂唔到，所以想基仔幫我搽太陽油。」基仔爽快答應：「我將我第一次幫人搽太陽油送俾你！」他坦言自己從沒幫人搽太陽油，就連古太不例外。
小方表示環島游需時12小時，故在游泳期間要有專人餵他進食，而這位「餵食員」肩負重任，要能頂着睡意，又要分配食物，最好是老婆或女朋友擔當這項工作。基仔立即問：「咁係咪會曝光（女朋友）啊一陣？」小方遺憾回應：「我無喎，咁點算啊？」指自己最後找了一名男性朋友幫忙。
小方更自爆自己日前與基仔傳短訊盡訴因近日生活太有紀律，「愈有紀律嘅人愈悶，愈悶就覺得自己可憐。」基仔忍不住大爆：「不如講白啲啦！佢同我講佢覺得好lonely！」又鼓勵小方下一個目標可以是「脫離Lonely Heart」。