ERROR隊長Fatboy梁業首次「單飛」推出新歌《Lady Killa》，Fatboy收起惹笑形象，以多個「型男」造型上陣拍攝MV，錄製新歌後更搵許廷鏗俾意見。
Fatboy日前出動半百工作人員及10多位舞蹈員拍攝新歌MV，期間還邀請靚女模特兒關雅芳（Vagary）擔女主角，為配合MV風靡萬千少女的主題，Fatboy Chok爆以多個型男look上陣，對於首度「單飛」出歌，Fatboy大叫緊張，他不僅花了近兩個月籌備MV，更劇意減肥上陣，而且更碌盡人情卡邀請朋友幫手，他說：「今次Idea自己係一塊唐僧肉，有好多女仔圍繞身邊，今日所有舞蹈員、武術指導都嚟幫手，基本上為咗今次MV拍盡人生所有膊頭。」問到今次在MV中畀「女圍」，可有感覺艷福？Fatboy說：「唔敢講，因為全部都係識咗好耐嘅朋友。」
問到Fatboy今次MV女主角，為何不邀請在《男排女將》中成功「抄牌」的鄧麗欣？他表示：「女主角都篩選咗好幾個，最想搵欣宜，因為女主角係Queen嚟，佢跳得、而且出嚟好有霸氣，但可惜時間配合唔到，至於Stephy都有諗過搵，但自己太怕醜，最後都係唔敢搵佢。」此外，Fatboy又表示，當收到花姐通知可以「單飛」出歌，他非常開心，並感謝許廷鏗給予意見：「音樂人我識唔多，但好多謝許廷鏗介紹音樂人畀我，而且又畀咗好多意見，令我可以促成今次呢首歌，錄完之後，我都有畀佢聽，佢話OK，增強咗我唔少信心。」
