九八年度港姐季軍吳文忻（現改名吳忻熹Nathaliie），自一一年嫁給有「南丫島王子」之稱的金融才俊陳劍陵，生下兩個得意囡囡後，便淡出幕前。
Nathaliie閒時會在社交平台貼出一家旅行照片，穿上比堅尼泳裝的她身材依然不輸當年，不過近日已少有更新；上周本刊收到Nathaliie的電話，她聲音沙啞地說︰「我想出嚟做個訪問，再困喺屋企有等死嘅感覺……」原來，Nathaliie兩年前確疹乳癌，今年復發時已是第三期，更擴散至淋巴腺，Nathaliie這次出來最希望「醫好自己幫到人」。
Nathaliie是九八年港姐大熱，最終獲得季軍，冠軍是向海嵐、亞軍趙翠儀，同屆港姐還有呂麗君、《真情》的「津津」梁珮盈等。Nathaliie在一四年及一七年分別誕下兩個得意囡囡，大女Scarlet和細女Season，之後專注家庭和栽培女兒，兩名女兒就讀知名私立小學，動靜皆宜，不時在校內比賽和運動會獲獎。淡出幕前多年的Nathaliie，二○年曾客串演出ViuTV劇集《熟女強人》，但只屬玩票性質和過戲癮，當時亦沒有現身為劇集宣傳。
同身邊朋友交代
性格一向都報喜不報憂的Nathaliie，記者在電話中沒有多問，便直接約了她本周一（12日）在中環見面，眼前瘦了一圈的她，原來前幾日才做了化療，不過精神尚算不錯。已十多年沒有做訪問的她，坐下來便有話直說︰「唔好意思，依家把聲好沙，同埋講嘢都冇乜氣，嘩！啱啱影相記返初入行嗰個感覺，以前成日想做《明周》訪問，今次可以做《明周》訪問就唔係『好嘢』，我乳癌復發了，上星期開始第一次化療，可能一兩個禮拜之後就開始甩頭髮，而且冇力同身邊朋友交代，講出嚟，想俾自己多啲正能量去打呢場仗，希望醫好自己幫到人。」
兩年前，Nathaliie到美容院做facial順便通淋巴，想不到發現左胸有硬塊，「治療師幫我按胸通淋巴，佢推推吓就話『有粒嘢喎吳小姐』，既然有人同你講，咁就一定要去check啦，醫生就話要即刻照，佢見到個shape都唔靚，再抽針驗，一驗就係一個噩夢開始。」
當時Nathaliie馬上決定做手術把癌細胞切掉，「當時照就唔係好大粒，撞正農曆新年，仲要細女臨生日之前，我好快就選擇咗做手術，切咗個癌細胞，做完手術三日就出院，其實當時醫生都有suggest做一個preventive嘅chemo（化療），一聽到chemo我相信冇人會想做，我當時就冇做，連電療都冇做，淨係做手術，醫生就話咁每半年返去check啦。」
Nathaliie一直崇尚自然療法，很少睇醫生食西藥，她續說︰「我都睇咗幾個醫生，有醫生就suggest整個切掉就一了百了，雖然可以重建，但作為一個女性，當然唔想冇咗個胸，當時切出嚟嘅癌細胞大約2.5cm左右，其實比照嘅時候已經大咗，手術之後都一邊大一邊細，但都唔係好覺；今年卻復發了，發現時變大咗好多，有成5、6cm，已經第三期了，同埋開始有啲去咗淋巴，咁真係要好認真咁去面對，因為擴散咗就無得做手術，一定要做chemo，再加一個叫做免疫治療。」
由得知患病到治療，Nathaliie只同老公講，連父母都沒有講，「一直都收得幾埋，我啲朋友得一兩個知道，我都收埋自己一段時間，要啲時間去接受，最近真係冇辦法，要接受，先同爹哋媽咪講，佢哋都算冷靜，可能知個女一向都報喜不報憂，亦開始同身邊朋友講，開始好多information，我想專注打呢場仗，已經冇乜氣力逐個朋友回覆，今次想做一個訪問講俾大家知，亦希望與同樣患病嘅人一齊面對。」現時Nathaliie隨身帶上一樽蛋白粉飲品，一肚餓就飲，「依家經常都肚餓，亦發覺自己磅數跌得好快，肌肉流失得好多，我一向唔係好相信西藥，之前一路都想用自然療法去搞掂，唔係話自然療法唔work，但真係唔夠佢（cancer）快，所以要用西藥嘅時候，點都要補充返營養，我依家得返九九磅，我選港姐嗰時都一百○一磅，我從來都未試過唔需要努力去減肥，我自己都驚，係咁迫自己食嘢。」
覺得有等死嘅感覺
得知乳癌復發，Nathaliie今年五月去了一轉意大利散心，「知道復發時，咁啱有間帆船品牌Solaris邀請參加一個帆船比賽，我第一次玩就贏咗，都俾咗好大信心自己面對呢個病。」不過，Nathaliie直言現時情緒時好時壞，尤其做完化療之後，「做完chemo之後，嗰幾日全身腰痠骨痛，上個禮拜發覺咁樣落去唔掂，因為再係咁樣收埋自己，又唔講俾人聽，自己喺屋企我覺得有等死嘅感覺，又唔敢大喊，不停會問why me？我平時都好健康又食得健康，why me？所以我覺得我每日都要做啲嘢囉，開始整好多食療，全部for我依家個身體去打仗，覺得應該share出去跟同路人分享。」
Nathaliie最近開始鼓起勇氣與癌魔打仗，亦覺得要與兩個女兒交代，「我都好驚佢哋會唔知點樣接受，但出奇地佢哋反應都幾得意，依家暑假，兩個女好鍾意過嚟同我瞓，有一晚我已經prepare好點樣講，大女第一個反應就係『So are you going to be bald? Are you going to shave your hair?』原來佢哋喺Netflix睇咗一套《Alexa & Katie》，係講一個teenage女仔患上cancer，佢個好朋友陪佢一齊剃光個頭，好正面嘅，反而細女就仲未意識到發生咩事！其實小朋友好聰明，好感受到媽咪，呢件事上面我覺得應該要對佢哋坦白，大女咁understanding真係好感動，因為工人最近放假，佢自動自覺幫手洗碗，學掃地吸塵摺衫，係一個幾好training。」
訪問翌日（13日），Nathaliie做第二次化療，她在電話說︰「醫生今日話要做八個cycle，之後就應該再做手術，重唔重建就之後再決定啦，做完手術之後，仲有九個cycle免疫治療，一切都見步行步，呢場仗起碼打一年以上。」最後，Nathaliie希望拍低自己的抗癌歷程，不定期在《明周》的平台與大家update近況，她說︰「都係想醫好自己幫到人啦！」
場地︰一緒一番酒場