林敏驄昨晚（19日）在其主演的無綫台慶劇《下流上車族》一集中，與「金像獎影后」鮑起靜（鮑姐）大鬥演技，誰也搶不了誰的鋒頭。劇情講述車志明（林敏驄飾）踩上「老小三」毓霞（鮑起靜飾）屋企欲拿回亡父神主牌，之前已遭兒子「拋棄」的毓霞不甘仔又冇「老公」又被搶，對着志明怒吼：「我個仔要移民丟低我唔理，點知你仲衰，你連死人都要同我搶！」志明聞言即反擊：「你同你個仔啲嘢，唔好拉埋我落水。」並叫毓霞反思自己如何對待家人，又指住毓霞手上「定情信物」說：「我老竇同埋呢隻戒指，本來都係屬於我阿媽㗎！」
愈說愈激動的志明最後哽咽：「我淨係知你擺我老竇（位置）低過隻狗，你好唔想見到佢，我咪依家攞走佢，唔使你眼冤，得唔得吖？」最終毓霞被志明激動又真摯的情緒「擊倒」放棄「老公」，默默地執拾好亡父神主牌的志明，離開前語重心長向以刁蠻馳名的毓霞道：「有個問題我想答埋你，你話我間屋企細，擺唔落我老竇，我想話俾你聽，間屋企幾細唔係問題，最緊要一家人喺埋一齊。」發人深省的對白，配以巧妙的鏡頭及配樂，非常有感染力。
向來愛搞鬼的阿驄，今次戲路突變竟然零違和，而無論對白或舉手投足都充滿戲味，一點也不林敏驄，惹來網民一致好評：「明顯有好多對白係入晒戲，想喊嗰吓唔係扮出來」、「啲戲由內而外，唔造作好自然」、「呢場好好戲，有機會爭視帝！」
其實鮑姐前晚一集展現遭仔仔「拋棄」，發出悽酸的錄音solo戲，亦同樣因感人度高引起熱話，先是激動地指控阿仔，之後再以「淒慘」tone希望對兒子動之以情，「阿媽淨係得番你一個，咁你係咪都唔想要我喇……」這一句更說得一臉哀傷兼自憐，打動無數網民，亦立體地道出了欠缺關愛的獨居老人苦況，網民留言：「鮑姐呢段可以攞視后啦」、「好鬼滾動，睇到眼濕」。
是集另一焦點，要數到羅毓儀飾演的車蔓蔓爆喊戲。劇情講述她因違反候鳥保護法而被踢出校兼遭取消簽證，當然被媽媽雯慧（江美儀飾）鬧爆，蔓蔓爆喊道出孤身在他鄉的苦況。毓儀受訪時透露：「我都曾經去過外國讀書，一個人喺外地真係會好掛住屋企人，所以準備劇本時都有諗番起以前嘅事，令到情緒容易啲代入。」毓儀又爆驄哥百厭行徑：「拍嗰場戲嘅時候爹哋（驄哥）對住杯咖啡吹泡泡，好好笑，我見到嗰一下都有啲擔心喊唔出，不過好彩冇事！」
