TVB歌唱真人騷《中年好聲音2》周日（24日）晚播出的第三集，繼續是首回合盲選爭入60強的比賽。今集出場的選手，有不少是觀眾比較熟悉的面孔。55歲的前歌手鄭梓浩在台上說：「我喺四大天王最紅時出道，係一個被遺忘咗嘅歌手。」鄭梓浩雖然年過半百，但靚仔樣和身形保養得宜，他選唱《歲月流情》，張佳添大讚：「你嘅音色好靚，同埋你用共鳴唱歌，已經贏咗一半。」
41歲的香港小姐季軍戚黛黛選唱《別問我是誰》，周國豐指：「你演繹成首歌好工整，但冇乜味道，唱唔出對愛有渴求嘅感覺。」48歲前《閃電傳真機》主持兼歌手姚安娜則以吉卜賽女郎造型亮相，加上面部特色化妝，非常搶焦。
今集同樣有感人故事，現年52歲、鄧兆尊胞弟鄧兆榮選唱《愛的根源》，身為新馬師曾和祥嫂洪金梅兒子的他在台上說：「人到中年有啲遺憾，2013年時我哋幾兄弟姊妹同媽媽有啲誤會冇聯絡，去到2019年我鼓起勇氣，喺母親節打俾媽媽同佢道歉，媽媽好大方話原諒我，但佢話有啲唔舒服，遲啲再搵我。」怎料一個半月後兆榮收到噩耗，他說：「急症室打電話嚟俾我，話媽媽喺急症室接受治療，當時先知道媽媽患咗癌症第四期，之後一家四兄弟姊妹同媽媽團圓番，鼓勵佢對抗病魔，但好不幸媽媽喺個幾月後就仙逝，我一生人嘅遺憾係未盡孝道。」兆榮爆喊說：「想同父母講，我喺你哋在生時，可能做得冇咁好…但依家我會做個好爸爸、好弟弟。」
兆榮望以自身經歷提醒大家不要愛得太遲：「希望各位觀眾，如果同父母、兄弟有咩誤會，只要自己行出誠意第一步，一家人係冇隔夜仇，唔好好似我咁後悔莫及！」兆榮兩個囝囝都有到場為爸爸打氣，非常溫馨。
