歌唱真人騷《中年好聲音2》昨晚（8日）播出一集是60強淘汰賽，60強選手一對一PK爭取晉級30強。上回合的5燈選手李浩森、古淖文上演5燈對決，率先上場的李浩森獻唱《Twist And Shout》，惟表現有所失準只獲3燈，但卻獲伍仲衡大讚：「你有排玩呀！」等待台下選手挑戰期間，古淖文突然舉手「下戰書」，即時引來嘩聲四起。惟以《摘星》應戰的古淖文同樣表現失準只獲3燈，被批與浩森一樣揀錯歌。由於兩人同分關係，晉級30強人選交由評審團投票決定，最終古淖文以4比1票數成功晉級，浩森則被伍仲衡「燈走」，伍仲衡繼續力撐浩森說：「唔緊要，我搵你唱歌！」
陳俞霏上回合豪奪5燈，今次她獻唱《初戀》貫徹Chill爆演出風格引爆全場齊齊Un，最終冧莊5燈直接晉級30強！張佳添和周國豐直指睇得好Enjoy，惟伍仲衡略嫌陳俞霏情緒太Over：「Feel到你好開心，但feel唔到冧，嗰種Hyper有少少over！」說畢遭主持婉婉「質問」：「咁你又撳燈？」伍仲衡爆笑回答：「咁佢係值得伍仲衡盞燈，咪拎5燈囉！」
憑自帶強勁氣場被封為「大佬」的鍾晉生亦於昨晚一集登場，外表剛強、內裏溫柔的他以招牌「重低音炮」獻唱《情人的眼淚》，唱到尾聲時更眼泛淚光，最終他以4燈揮低2燈的蔡京瞵。惟成功晉級後，鍾晉生宣布退賽，並將晉級名額讓給其他選手，他說：「呼應番《中年好聲音》呢個節目，每一位中年人都背負住好多包袱，我決定要退賽，我係時候要返番去自己工作崗位，中年人有唔同目標抱負，我要為另外一個夢想繼續奮鬥。」