伍仲衡指《校園好聲音》是由香港中文大學及兩間內地大學聯合舉辦，付錢給TVB製作及買了時段播放、TVB提供一廠舉行，他肯定稱主辦方不是TVB。獲邀擔任評判之一的他在比賽時已高度評價洪心怡，亦即場問對方可否約試音？心怡都答可以。比賽後心怡果然有應邀試音，並於8月22日在他的平台開Live。
伍仲衡指老婆在TVB及不同唱片公司擔任宣傳人員廿幾卅年，即使歌唱比賽不是TVB舉辦，沒與參賽者有約，但他正為《中3》擔任評審，又參與不少綜藝又拍劇，有這個決定一定不會不通知TVB，坦言若要隱瞞TVB，後果會好嚴重。他說伍太先打電話給一位相熟的TVB高層，表達了希望一齊經營洪心怡這位歌手，並覺得會是雙贏。
就在洪心怡為《2024香港小姐競選總決賽》擔任表演嘉賓之前，伍太入電視城跟高層商談，伍仲衡續謂：「傾過一次，傾咗一次再傾唔到，（TVB）冇主動搵，已經約唔到，傾唔到落去，感覺唔係好想同我哋傾偈。」與此同時，TVB給洪心怡一份合約，他重申沒參與其中，正如心怡日前跟記者說，她上《J Music》時已跟TVB說了不會簽，然後她跟伍仲衡說了自己的決定，伍仲衡才夠膽與洪心怡傾合約一事。
伍仲衡隨後在生日會宣布跟心怡簽約後的一周內，他接到電話通知原本今個月要錄影《中3》暫時不需要他：「其實我都唔需要再問點解，大家都知點解，咁我就話好啦冇辦法啦。我對得住自己，我亦都冇犯任何規，簽歌手一直係我嘅夢想，任何音樂人都希望有自己品牌歌手」、 「我嘗試過問可唔可以合作，佢唔揀同我合作，冇辦法強求，佢（指洪心怡）未來嘅路唔易行，我一定會陪佢。」
伍仲衡最後表態會繼續看《中3》：「我擔心啲參賽者，擔心肥媽（Maria Cordero）究竟冇人寸佢，佢會唔會唔慣呢？我都好擔心周Sir（周國豐）左邊冇咗，右邊會點呢？我哋仍然好朋友嘛，當我轉工囉，其實我一定會繼續睇，所以你哋唔好唔睇，你哋要有氣量，一定要支持啲參賽者，同埋支持車婉婉（主持），記住一定唔好因為我唔睇，要繼續支持TVB，尤其係《中年好聲音》，因為我都會繼續睇。」
