音樂人伍仲衡剛於上周四（21日）迎來51歲生日，除了跟同日生日的顏志恒一齊舉行生日晚宴外，他與相隔一日生日的伍太Ida還一起獲《聲夢傳奇》出身的冼靖峰（Archie）和鍾柔美（Yumi）請食生日飯。
伍仲衡在社交網貼上4人飯敘照，留言自爆：「多謝Archie、Yumi請我哋食生日飯，不過我睇錯時間，遲到咗兩個鐘。」不少網民都戥Archie和Yumi慘慘，請人食飯還要等兩個鐘，大讚兩位年輕人難得有耐性。伍太亦有帖文留言多謝他們：「很豐富的生日飯，仲有好靚嘅蛋糕，你哋今年一定會記得有人記錯咗時間遲大到，下次要佢請返你哋食大餐，仲要佢早到返兩個鐘先得」！
