伍允龍與好兄弟安志杰亮相無綫節目《諸朋好友》，分享一些難忘的感情經歷，安志杰直言也曾試過被人稱呼為「某某男友」，令他感到非常無奈，看來說的是當年與謝婷婷拍拖時的舊事；伍允龍聽到安志杰的分享，自然想起當年與鍾嘉欣拍拖的經歷，他覺得自己比安志杰更辛苦，「當年我成日俾人叫茄喱啡、奀星，但其實我主演過電影，拍咗好多戲，亦都好努力去做，好似拍《賭城風雲》咁，一個鏡頭被車撞，我撞咗廿五次，又試過從一樓跳落嚟，差啲斷腳，但都冇人知，我唔係投訴，只係唔明白點解焦點會放喺地位分別上，同埋同邊個拍拖。（咁多負面影響，點解唔放棄段感情？）其實Ok，開心嘅。只係對方喺工作上嘅問題，要收埋我少少，我Ok嘅。（你覺得電視台俾咗壓力你哋？）佢嗰方面啦，因為工作要收埋我，相信佢方面有啲壓力，咁我明㗎，當時佢好紅，但我係無名小卒，我明白嘅，不過就覺得過分咗去做呢件事，變咗個傷害喺我度。」
他表示今次是第一次講，也坦言有不滿同不開心。「係唔忿氣，但長大咗，過咗去喇，咁啱當時TVB有幾部劇搵我，但我經理人覺得唔適合推咗。」幸2016年終於遇到劇集《城寨英雄》，伍允龍成功入屋，從此吐氣揚眉，更進軍荷李活拍電影。
