《金宵大廈》近日熱播，昨晚播出的第二個單元《雙魚》，伍詠薇飾演一名控制狂媽媽「芬姐」，其中一場講述她在打掃屋企，發現牆上出現一個雙魚圖案，之後她不停抹，並掃上油漆，但發現圖案仍然浮現，之後不停對空氣狂鬧，神情詭異，當門鐘一響的時候，伍姑娘的表情變得和顏悅色，一秒變面，令人不寒而慄，演技超班。
伍姑娘近日接受由林柏希主持嘅網上平台BOX channel節目《月傾會》的訪問，被主持問到有否掛念亡夫翁江培，向來敢言及勇於表達真性情的她深情地說：「邊個對過我好嘅人，我係記喺心裏面。翁生係我第一個明燈，亦都係我第一個丈夫，冇血緣關係但係最親密嘅人，佢教我最多嘢，係我老師亦都係我丈夫、係我明燈。如果冇佢教我點樣用第一張信用卡，我唔會去到今日咁有骨氣嘅伍詠薇！我係掛住你㗎，翁，所以我覺得啲人話我生命裏面咩遺憾，真係陰功呀，咩陰功啫，上天有好多嘢安排晒，我無悔第一段婚姻，因為第一段婚姻，令到我學識好多嘢，同埋係我真愛！」她之後又表示若非前夫翁江培提議佢選亞姐，佢好大可能已經行咗另一條歪路，「我成日諗，我做乜嘢呀，我可能『華燈初上』咗！如果冇支明燈點過我，我應該會行歪路多，我覺得應該會做咗啲名媛呀，名媛唔係話壞呀下，名媛之前呢，我應該會做咗，送上千萬溫柔嗰啲囉，舞小姐囉！」
林柏希再問佢有冇留意現今樂壇，不得不講最紅嘅MIRROR，伍姑娘話：「193最近嗰隻歌都幾好聽喎！仲有姜濤《蒙着嘴說愛你》嗰啲啦，我覺得佢好勤力囉，我幾like佢，如果佢做我個仔，我會教得佢更加好！」如果有套戲新開搵伍詠薇搭姜濤，想做母子？定係姊弟戀？伍姑娘說：「母子啦！」諗諗下就話可以用西片《畢業生》條橋喎，「姜濤鍾意咗我，我其實係阿姜濤同學嘅阿媽嚟嘅，咁就得！」