首次出戰奧運的香港劍擊選手何瑋桁（Cedric），昨日（28日）於男子重劍32強比賽中落敗，賽後接受TVB採訪，他曾經一度領先7：3，但最終比分9：15無緣晉級，他自言已經盡力，遺憾是中段被對手追回幾分時，自己亂了陣腳，受訪期間仍然情緒激動，突然爆喊，「其實我自己都知道，我嘅對手我係唔夠打嘅，但我真係好想贏！Sorry……」他表示與對手山田優（上屆東奧團體冠軍成員之一）在過去十多年，曾多次對陣，但從未在對方手上得分多過5分，「所以我打之前話無壓力大，其實我都好緊張，一開始領先咗，我覺得自己有機會，但把握唔到，我覺得我可以再做好啲！」在TVB錄影廠擔任主持的專業評述員、香港劍擊代表連翊希（Coco）在何瑋桁受訪期間，除了恭喜他首次踏足奧運舞台，又作出鼓勵及打氣，在訪問完成後，連翊希為男子重劍運動員發聲，她大讚何瑋桁取得亞運會銅牌及亞洲錦標賽金牌，已經破晒紀錄，創造了男子重劍歷史，Coco然後哽咽落淚表示覺得大眾一向只提及女子重劍，但其實男子重劍一直以來行了好多路，「男仔比賽比女仔難打好多，所以好多男子重劍運動員，都好值得我哋香港市民關注。」
何瑋桁在心情沉澱了一日後，在社交平發文：「由14歲第一次打劍開始，去奧運一直係我嘅夢想。2024年7月28日，我終於踏上咗呢個舞台，呢兩年終於搵返自己，由亞運銅牌開始，到拎到奧運資格，再得到亞洲錦標冠軍，一切都係對我嘅努力一個很大的肯定。嚟到巴黎大皇宮呢個舞台，我真係好想贏好想贏，好想再一次證明自己係得，但係奇蹟沒有出現，回想返輸嘅一刻好唔甘心，當刻係度諗，完左喇，就咁就完左喇，但係我已經盡咗力……
我希望今次奧運係一個開始，呢年密集嘅比賽終於完左，接住嚟會休息一段時間，之後會重新岀發，未來重有好多比賽會繼續努力，希望再有機會參加下屆LA奧運。最後好多謝所有係香港嚟巴黎支持香港運動員嘅觀眾，亦都好多謝所有喺香港支持我地嘅觀眾，市民，傳媒，朋友，隊友同兄弟，好多謝我教練將我係迷失嘅路上帶到我嚟到呢度！
更加要多謝我爸爸媽媽同未婚妻一直全力支持我喺劍擊嘅路上，未來會重新岀發，勇往直前，繼續努力爭取更多好成績，嚟緊重有好多香港運動員亮相，希望大家繼續支持香港運動員！」
更多圖輯：
