ERROR成員保錡今年初被爆同女神張沛樂（沙律）拍拖，消息一出，他們坦認已拍拖一段時間。同一時間，與保錡一起了2年的賴嘉賢（Carrie）則說他們二人未分手，故保錡被網民大插「偷食」。雖然保錡其後在Instagram向Carrie公開道歉，但網民仍然沒有放棄追擊行動。直至今日，保錡終於宣布暫別娛樂圈，自認過去的自己毫無分寸。
對於保錡宣布暫別娛樂圈，花姐透過文字回應：「尊重保錡決定，俾啲時間佢沉澱，知道佢今次好內疚，覺得佢上了人生一課，我有信心保錡再見大家的時候會變得更好更成熟，期待再見到ERROR 4子嘅畫面。」
保錡Instagram 所打的全文如下：
「我知道，最近凡有我出現嘅嘢都會令好多人唔開心，ERROR出首歌嘅MV又好、節目又好，就算肥仔Dee哥193做訪問，記者朋友同大家都會追問關於我嘅野。我覺得我影響咗好多人，尤其ERROR同一直鍾意我哋嘅人。反思咗好多晚，雖然我講咗好多次會重新出發，但覺得依然欠大家一個交代。我意識到一方面我之前處理感情嘅事做得唔好，另一方面，當晚直播嘅言行舉止係好唔啱，說話亦無尊重過人。呢啲全部都係我嘅過失，我要面對自己嘅錯，出嚟同大家再次道歉。
之前嘅我睇大家抨擊我嘅comment，第一個反應係會好嬲，但係呢兩日睇到凡係有我嘅嘢，MV、節目、訪問等等嘅留言，反而覺得好內疚，我覺得因為我嘅錯，影響到其他人，製作團隊嘅努力、其他同一個節目嘅藝人、ERROR佢哋三個嘅努力全部都因為我受影響。我嘅錯，應該由我自己一個去承擔。
所以，我已經同公司講，喺完成手頭上已開始嘅工作之後，所有工作將會暫停。我亦唔會參與任何節目及ERROR歌曲嘅宣傳。我認為咁樣係一個對我應有嘅懲罰，希望唔好累到其他兄弟，亦唔好因為我嘅關係而抹煞左所有人嘅心血。
作為ERROR嘅一份子，覺得自己連累咗三位兄弟，破壞咗ERROR嘅形象，好對唔住，諗返呢兩年同三位兄弟嘅經歷，同193拍ERROR遊嘅時候好冇膽，由咩都唔敢，到最後都敢試；Dee哥係ERROR嘅talk show入面捱更抵夜咁幫我地度稿；肥仔一直都好鼓勵我做音樂，主動幫我爭取為ERROR寫歌；而家回憶返過去同三位兄弟一齊做嘢真係好珍貴，嚟緊ERROR嘅團歌，希望大家繼續支持佢哋。
我知道保錡係大家眼中係一個毫無分寸嘅人，但希望下次大家再見到我嘅時候，會見到一個懂得尊重、願意承擔責任嘅人。我希望用行動證明。
再次同大家講多次對唔住。」
圖片來源：吳保錡、張沛樂＠Instagram