余迪偉（Alton）一連四場於西九龍文化區自由空間大盒舉行的個人劇場騷《Fabulous Me》日前完滿落幕，余迪偉坦言終於放下心頭大石。回想四場演出，Alton收到不少迴響，最令他感動是他的前度男友帶埋媽咪來看，事後對方媽媽的一席話，令他的前度感動爆喊，可見不只同路人感受至深，原來也能溶化與家人之間的關係和隔膜。
Alton大談感想，他說︰「演出之前，我一直都好擔心，以為自己handle唔到，亦覺得好似俾導演『坤』我落搭咁，依家感覺原來變成一個mini musical。」演出的內容，包含了他的成長經歷，有喜有悲，而他最大的得著，就是有不少觀眾和fans看完給他的留言，他說︰「好多觀眾同fans睇完之後留言俾我，當中笑的、淚的，陪住我一齊共鳴，所有笑聲、喊聲都好值得，佢哋有所得著，呢一點係最令我感動。」
當中他亦赤裸地談及自己發現自己的性取向後，遇到不少的經歷，他說︰「其中一部分講我嘅成長時，面對自己嘅性取向，經歷過嘅一切，例如被人歧視、欺凌等等。」尤其在尾場他的前度帶同媽媽來觀看，他說︰「我嘅EX(前度)同佢媽咪嚟睇，當然佢媽咪知道自己嗰仔係基。」事後Alton問他的前度，伯母看了覺得如何？對方竟然爆喊，他說︰「我問佢，媽媽睇完覺得點呀？佢話媽媽問佢一句，你成長過程有冇經歷過呢啲事？」能夠獲家人諒解不只Alton的前度，連他也覺得好感動，令他覺得演出這個騷，是很值得的。
《Fabulous Me》的導演Patrick於四場劇場騷後，再次感謝Alton信任，他希望借Alton自身故事，想表達：「就算好似迪偉咁堅強，表面上係一個八面玲瓏嘅公眾人物，其實都經歷咗好多自我懷疑，心理健康問題等等，而入場觀眾反應比我預期中好，我好安慰。」多謝入場觀眾的支持，同時多謝台前幕後團隊，各人的投入，令他甚為感動。
