今年是古天樂入行三十周年,由當年的「古仔」到今天的「古生」、「古老闆」,一路走來當然不易,但是大人物必先有顆「強心臟」,強如古生,步入影樓的氣勢,那種氣場已經懾人。你以為他古肅威嚴,其實很幽默,問他,現在的古天樂仍有夢想嗎?53歲的他答:「去火星拍戲好唔好?」
去年古天樂在自家公司的十周年慶祝活動上提到,當初正式做老闆,領軍一間電影公司,命名為「天下一」的原意,當時古老闆在台上說:「中文名叫『天下一』、英文名叫One Cool,其實意思係All for one,one for all,我需要大家一齊同心合力,先可以創造到我哋想見到嘅未來!」
邁向更多個十年。人人都說初心,訪問這天,問古天樂創立電影王國的初心,他說:「作為一間電影公司或者演員都好,可以作多方面嘗試,唔單止淨係做一啲迎合市場需求嘅嘢!」人做我唔做,正如他的出品《白日之下》,「我自己好喜歡貼近社會題材電影,嚟緊都會有好幾部,唔係依家市場見到嘅電影,有一部係我同葉偉信拍嘅《誰變走了大佛》,我覺得係一個新嘗試。」
古天樂說,只做同一類型的事情,始終會有厭的一天,「要不停去探求,先會有進步!淨係做同一類型嘅嘢,始終都會有厭嘅一日,譬如依家所有Marvel電影都係啦,睇咗咁多年,大家都開始覺得有啲疲態,所以我覺得要不斷探求,係我做呢間公司座右銘。」
《明日戰記》只係啱啱開始
不停探求,先有進步。很多觀眾可能不知道,當大家在大銀幕,見到古天樂這位演員戲接戲的同時,其實他早已探求多方面嘗試,早在正式投資電影前,他已成立了後期製作公司,有留心每部電影片尾名單的都會發現,古生的後製公司幾乎包辦了所有電影後期工作,而拍攝港產科幻片,更是古天樂一直的心願。《明日戰記》算是圓夢?他說:「《明日戰記》只係啱啱一個開始!」
說起AI,古老闆興致勃勃愈說愈多,「另外,我成日都覺得,呢個圈(娛樂圈)以外,AI最可以取代,我覺得『會計』最快取代到,你揼晒啲數字落去,佢嘭一聲就彈晒出嚟,你仲使乜會計師啫?呢個係一個問題!所以我覺得,我哋必須要跟住潮流行,去做一啲唔同創作!」演員又會否被取代?「演員反為冇威脅,演員反而好咗添!譬如一個演員,年紀比較大,但我想拍返佢20歲嘅樣,AI可以即刻幫佢做到,甚至乎可以唔使個演員演,只要你將你個肖像權,授權俾我哋公司,公司可以幫你做,搵第二個演員幫你做都仲得!」
古天樂一直做,其實冇停過。在無綫年代,已經分身拍攝電影,演過一系列的《陰陽路》,到01年參演最後一套電視劇《尋秦記》後,正式轉戰電影圈,簽約向華強的中國星旗下,《嚦咕嚦咕新年財》與《絕世好B》等大受歡迎,之後與杜Sir杜琪峯合作無間,而在他入行廿五周年時,終憑《殺破狼‧貪狼》首度封帝。當年向華強有中國星、杜Sir有銀河映像,古天樂自組公司的念頭,有否受到他們影響?「我諗杜Sir係最多(影響),不過唔係佢影響我要自己做(公司),只不過係製作創作上,俾我一個好好訓練,包括對劇本睇法,現場拍攝點樣搵自己風格,演又好、拍又好,嗰個探求,我覺得係我跟佢嗰十年裏面,學咗好多嘢出嚟!」之所以有《柔道龍虎榜》、《黑社會》、《鐵三角》的經典出現……
怎樣形容與杜Sir的關係?「我哋都成日食飯,咩都傾!我哋兩個最大嗜好都係食嘢,都係搵啲好嘢食吓!(傾心事?)好少呀,我又好少、佢又好少!我都唔使傾心事,我唔會搵朋友傾心事,從來冇㗎!啲人話使唔使去舒壓呀,搵朋友傾吓偈,我諗我真係冇!」有問題都自己解決?「有咩問題咁大不了,自己解決唔到啫?我唔明呀!係咪講咗會好啲?又唔係!(起碼抒發出來先?)我本身個人已經好抒發,好像酒精一樣!哈哈!」
沒有解決不到的煩惱
不用拍戲的古天樂,放下了多重身份之後,真正做自己的時候,那個古天樂是怎樣?「我都會飲酒,但唔關飲酒事(解決問題)。我最鍾意夜晚冇嘢做,我一定會睇戲,有時睇戲,睇一次唔夠,我會翻睇嘅時候飲吓酒,可能會深入啲,第二次睇可能用唔同角度去諗嗰件事囉!我都話依家睇戲,唔只係一個娛樂,你要睇成個marketing係乜嘢,全球觀眾需要呀!過去三年疫情,對於全球觀眾嘅改變非常大,有時唔單單睇嗰部戲好唔好睇!《Barbie》未上之前,你驚唔驚吖?大家都好驚吖(票房)!嘩,結果幾收得!同埋佢真係好大膽,個故仔好大膽用呢個方向去寫呢個題材!」
獨處時候都是滿腦子電影與marketing,到底現在的古天樂,有沒有煩惱?「咩叫煩腦啫?我冇咩特別煩唔煩,有咩要解決嘅問題,我都好快(解決到)!我唔鍾意將啲工作砸過夜呀,我係即刻做、即刻解決,所以可能變咗冇咩太大煩惱;反而創作上就有(煩惱),你要諗橋嘛成日,你劇本睇完之後,你問我,好呀,可以做喎,但係你問我,咩劇本都要改㗎,要慢慢執!我成日都講,我返去開會都講,依家拍一部戲,今日開始籌劃,拍攝完畢就搞掂上畫?都起碼年半兩年啦,兩年之後,世界發生咩事,你知唔知?你依家寫呢個劇本俾我睇,係今日,但兩年之後呢?所以我不停諗未來方向,應該點行落去,觀眾最想探求見到啲乜嘢?市場點樣變化?點樣同新一代再夾多啲新嘢,各樣各樣,其實我唔覺得係煩惱,呢啲係我必須要去做!」
唔攰咩?「係㗎!啲人成日都話,做一陣就要放假,去旅行休息吓,我從來都冇!如果真係飛去嗰度做嘢,咪留喺嗰度玩一兩日囉!」早前元宵節,古天樂就被野生捕獲於泰國四面佛還神。普通打工仔有年假,古鐵人有沒有呢支歌仔唱?「冇!我唔使拍戲都係(放)假㗎!咁都會有收工嘅,又唔係戲接戲,你又唔好講到咁咩!疫情都停咗兩年,好少戲開啦!」
裝置:Ka Wai
造型:Anthony Tong
造型助理:Gaster Chan
髮型:Dan Tam@04
化妝:Carmen Man
服裝:GUCCI、BOTTEGA VENETA、RALPH LAUREN、ALEXANDER MCQUEEN