應智越（細貓）是《全民造星》第一季的10強，參加過《偶像練習生》，亦是韓國練習生。曾半隻腳踏入MIRROR，卻因各種原因變成獨立歌手，出道三年，星途尚算順利，前年舉行處男個唱，又與鄭裕玲（Do姐）拍旅遊節目。
直至去年，細貓的前女友在社交平台發長文炮轟，細貓迎來事業第一個打擊，選擇低調處理的他，坦言最生氣的是母親；在單親家庭長大，細貓自小知道要生性搵錢養家，就連做歌手，都是因為母親的一個遺憾。
雖然入行短短三年，但細貓十一年前已選擇到韓國讀書，繼而當上練習生，「因為我係第一屆DSE，跟末代A-Level考生爭大學，當時的學位根本就唔夠兩年的學生，2013年便去韓國，本身去到是先讀韓文，直到2014年在韓國慶熙大學讀音樂，才有機會去training。」
細貓坦言當時並不是因為K-Pop文化而去韓國，他解釋：「對音樂是有興趣，喜歡創作，但在香港本身修讀的科目與阿哥一樣，由小到大，在家裏什麼都跟阿哥比較，我小時候好肥，成日黐住阿哥，阿哥帶我出去會覺得有個肥細佬阻住晒，以前阿媽成日都叫阿哥帶我去踢波，咁又細個又肥，其實去到邊隊都會拖累，係啦，總之就唔想同阿哥讀同一樣嘅嘢。」
細貓所讀的大學出產過不少知名韓星，包括孔劉、Rain、G-Dragon等，「我記得嗰陣最hit係《Gangnam Style》，所有學生，其實個個都目標清晰，好清楚自己做緊乜，我的確有些被潛移默化，一落堂，有人問香港學生聚會食飯，但我係選擇練習，仲係要偷用音樂學院的音樂室、練琴室去練琴練舞，都習慣囉，大家朝早九點上堂，canteen食完lunch，跟住練琴練到五、六點，又係去canteen食晚飯，你可能會覺得都練到夠皮啦？夜晚去邊度行下？唔係囉，都係繼續練琴，練到十二點。」細貓能夠堅持，全因為母親的一個遺憾，「大家成日都講，俾心機讀書就搵到錢，其實係咪真㗎？唔係個個家庭都會俾子女去讀音樂變成職業，我話去的時候，阿媽先講原來音樂係佢夢想，因為細個根本冇呢啲機會，好想個仔繼承夢想，知道阿媽有咁嘅夢想，咁就係咁衝！」
進行偶像訓練期間，有內地公司到韓國揀蟀，細貓曾經與朱勻一、朱勻天、萬宇賢、趙俞澈組成偶像男團Catchers出道，發行一首單曲《Dangerous》，但這次變成了他日後不敢與人合作的原因，「當時都是無知，跟內地公司簽約咁就出道，之後就發現唔係咁簡單，當你長時間工作完，原來係沒有任何收入，很正常跟公司關係會愈來愈差，當時我23歲，好好彩，認識了一位PR姐姐，介紹了參加《偶像練習生》，終於可透過自己的實力去搵機會，直到呢一刻，唯一感恩就係因為有呢一段經歷，導致到可以參加選秀節目，再繼而玩到《全民造星》。」
細貓經常被指是第一批被花姐睇中加入MIRROR的參賽者，他解釋：「玩節目的時候與內地公司都已經打緊官司解約，其實到而家都未完晒，情況比較尷尬，選擇做獨立歌手，主要係因為這次經歷，唔夠膽再同其他人合作，同埋並不是特登唔去同MIRROR嘗試溝通，花姐的確有問過我，但當時根本未成形，可能最終他們都不會選擇我，唔係我冇選擇他們。」
決定做獨立歌手，細貓與經理人各自出錢投資，「一開頭每人出30萬，但係第一年真係用最多錢，第二年最難捱，又因為疫情，連公開表演都冇，完全零收入，第一年埋單收入係得八千蚊，幸好，現在已經不用再出錢，公司已經營運到。」
事業慢慢上軌道，突然被模特兒前度大爆拍拖內幕，細貓選擇低調處理，只用新歌《You’re Gone》表明立場，「上年經歷好多高低起跌，遇到低潮的時候，發現身邊都會有些人會離開，其實上年真係算低潮，最主要是自己精神狀態唔係太好，當時好唔開心，不停搵朋友傾訴，有些朋友知道我情緒有問題，陪我去旅行。」細貓當時亦需要看醫生處理精神狀況，「去搵專業人士，都有食藥，仲食緊，但係最主要唔想屋企人睇到，他們當然擔心啦，阿媽簡直係嬲到爆，其實感情嘅嘢每件事都是雙向，唔講唔代表係乜？我都係想保護返所有人，唔想屋企人擔心，我諗呢件事特登走出來講，係百害而無一利，不過，你係咪話自己完全係冇問題？咁梗係唔係啦，我自己都承認，每一段感情裏面，大家都一定會有他們的問題，我亦都唔係完美。」
單親家庭長大，細貓習慣報喜不報憂，「好細個阿爸已經離開呢個世界，我當時4歲，好似係隔離枱飲醉酒而被打死，淨係判咗一兩年誤殺，我後尾先知啦，我好少交代自己屋企事，屋企得我同阿哥，所以細細個目標就係生性搵錢照顧阿媽。」
細貓去年首次拍攝電影《拼命三郎》，戲中飾演富二代，他笑言同現實大反差，「我做練習生日日都返便利店，唔食煙要記晒所有煙牌子，廚房做過、翻譯做過、搬行李都做過，大家平時去機場check in完啲行李要運送，會先儲埋一堆，我記得大概儲夠286公斤，就要推去上機，返工仲要穿一對防撞腳，行李要逐件pack好，拍戲嗰陣個個都話我個樣都似富二代，其實完全係另一回事。」
場地：SUIT Izakaya & Sake Bar