MIRROR於昨晚兵分三路，分別在尖沙咀、沙田及澳門與眾同樂，一同倒數，三站的氣氛均十分熾熱，而十二子亦都分別分享了2025年的新年願望。
尖沙咀區有「第二小隊」Ian、Jer、Stanley及Tiger 聯同Marf@COLLAR及加拿大二人組合Crash Adams 一起倒數 ，四人除了合唱充滿冬日氣氛的《12》，Ian及Jer亦分別演繹了個人作品《Thank You Postman》及《月居人》，之後他們又與Crash Adams合唱《Rumours》，將現場氣氛推至高峰，之後眾人在海旁欣賞煙花兼開心倒數，完全融入現場氣氛之中。來到新一年，眾人都分享了他們的心情，其中Tiger說：「好喜慶，因為呢個新年可以同大家一齊度過係好開心同幸福，至於新年願望，係任何工作都冇任歡迎，好好裝備自己，希望迎接新挑戰。」Ian亦表示：「今次係難得嘅機會，一齊迎接2025年嘅來臨。希望自己都身體健康，另外希望巡唱順利。」Jer則透露自己病了，他道：「希望大家身體健康，因為我今日都感冒，希望大家飲多啲暖水，著多啲衫，同埋多啲工作，開多啲show，其實唱live好開心，因為可以同觀眾近距離接觸互動，希望嚟緊下（今）年會有Show。」至於Stanley因為被Jer介紹而獲得Crash Adams賞識，所以他的願望十分特別，他道：「Crash Adams好欣賞我嘅Rap，仲誠意邀請我同佢crossover，到時Ian、Jer同Tiger可以扮路人，因為佢哋會影一啲人拒絕咗佢哋先嘅，佢哋就做嗰啲，咁跟住我OK，就同我嚟Rap，所以我要先學咗個Rap先，另外當然希望拍電影，有咩都拍！」
另一邊廂，沙田倒數活動同樣熱鬧，「夜粥小組」Lokman、AK、Alton及Frankie的出現，令現場擠得水洩不通，他們除了各自演繹solo作品《皮思苦》、《道路使用者的有型守則》、《如果電話亭》及《信之卷》外，他們更首度獻唱小組歌《FING!》，今次四子為首跳特別編排全新dance break版本的《FING!》，大跳混入electro dance的舞步，令現場尖叫聲不斷，事後被要求自評首度演出《FING!》，AK即表示：「可圈可點，so far so good，合格嘅。」Lokman也補充表示：「不過不失，當然第一次表演，都寄望有進步空間，如果第一次100分就唔得掂，根本冇可能，亦都希望今次未係好高分，希望會再有下一次表演俾大家睇。」至於日後可再有機會以小組形式出現，Lokman透露道：「嚟緊我哋個人、小組或者團體都有一啲計劃嘅，大家想知道就要留意多啲我哋啦！」問到新年願望，Lokman率先說：「祝大家身體健康，呢個最緊要，先做到其他嘢，然後繼續做自己想做嘅嘢，同埋順順利利開開心心。」Frankie也十分認同，「身體健康的確最緊要，搵到自己鍾意做嘅嘢最緊要。」至於AK簡而精說：「單純地好好運，恭喜大家。」而在台上提及自己2024年解鎖好多第一次的Alton則表示：「祝大家2025年都有好多個第一次，第一次搵到鍾意嘅事，第一次搵到好多錢，第一次乜都好。」
至於在澳門開show的「Strawberry小組」：姜濤、Anson Lo、Edan及Jeremy，在倒數前夕，他們都在台上分享了他們的新年願望，其中首度推出唱作作品《純銀子彈》的Edan說：「希望做多啲唔同嘅Job，出多啲自己寫嘅歌。」Anson Lo則延續2024年的願望，同時亦透露新動向，「希望繼續可以做到work life balance，可以繼續放鬆心情之餘，亦都可以繼續不停努力去衝，去工作。籌備緊今年第一隻跳唱歌 ，希望做好呢個project。」姜濤則將願望送給在場所有觀眾，道：「希望在場每一位將所有今年唔開心嘅嘢留低喺呢度，將我哋新嘅一年，新嘅心情，新嘅精神狀態，身體、心理上都可以健健康康，希望新一年大家都可以平安快樂。」至於Jeremy則感性表示：「2024年其實大家都挑戰咗好多嘢，做咗好多唔同嘅嘢，例如tour，返到香港各自又有唔同嘅project要做，今年我都好幸福地做咗好多唔同嘅show，累積咗好多唔同嘅經驗，希望2025年我可以有機會將呢啲經驗show俾大家睇，亦都希望下年做多啲好嘅歌送俾大家。好多謝大家一路支持我哋，無論MIRROR還是個人嚟講，我相信我哋全部人都會繼續努力去報答大家，因為大家都好叻，好多謝你哋！Thank you so much！」Edan也十分認同，感激台下fans道：「我哋今年步入第七年，過咗咁耐大家都咁支持我哋，就算到今時今日大家都特登過嚟支持我哋，好感動，同埋對我哋嚟講係好大力量，好衷心多謝大家。」Anson Lo也深表認同，「每次見到你哋，都係好似第一次出event一樣，都係咁感激你哋。」Edan更約定大家明年再次一同倒數，而在倒數過後，四子更與台下觀眾拍下2025第一張大合照，場面窩心又溫馨。
