鄭嘉穎與陳凱琳昨日（8日）夫妻檔出席珠寶品牌活動，早前「鐵馬家族」有新春聚會，嘉穎繼續缺席，與馬國明及其他成員的不和傳聞再次被炒起，他表示這個話題已經被傳一年多，不想再重複回答，「做朋友好簡單，唔出席唔代表唔妥，唔好諗得太複雜。冇不和，大家唔需要擔心，只係咁啱夾唔到時間。呢個話題冇必要再講，好悶，見到面就會見！」他覺我為人父母，很多時候都會以照顧小朋友為先，「人生喺唔同階段就會做唔同嘅事，我依家以小朋友為重。唔需要將小事化大﹗」Grace透露在農曆新年時家中有事發生，不太方便到處拜年，「我要專心照顧家人，冇周圍去拜年或邀請朋友嚟屋企。我已經同朋友解釋，唔想每日戴住面具對人笑笑口。」
嘉穎與Grace希望在即將到來的情人節過二人世界，可是當日亦是長子鄭承悅的生日，因為他不喜歡與同學一起慶祝，所以計劃一家人到主題樂園玩，實現他住酒店的願望，「佢生日願望係住酒店，日子愈多愈好，可能佢覺得住酒店較有新鮮感。我哋上次坐郵輪旅行6日，佢最開心。可能男仔性格外向，所以佢每年生日，我哋都會一家人去度假。」
今年是嘉穎和Grace的結婚7周年紀念，嘉穎記得在拍拖期間，在巴黎逛首飾店時，因為Grace的一個舉動，令他認定她是做老婆的最佳人選，「當時Grace要去巴黎工作，我情人節飛去當地搵佢，一齊去著名首飾店，叫佢任揀首飾，其實我個心都驚驚地，擔心會碌爆信用卡。佢最初唔肯揀，最意想不到係佢最後只揀咗一粒極細粒嘅心形鑽石戒指仔，幫我慳荷包。嗰一刻，我就諗要娶佢做老婆﹗」嘉穎結婚時送上巨鑽婚戒，以示回饋老婆。Grace沒想過那是一場考驗，解釋只是因為喜歡簡單款式。今年慶祝結婚紀念，因為要照顧三位兒子，兩人都沒打算舊地重遊。
