Gin Lee李幸倪推出全新廣東大碟《Leap Of Faith》，大碟收碌過去兩年所推出的九首作品，而今年首支作品《無愧於當初的我》亦同日上架。
籌備兩年多，Gin坦言想了很久，怎樣才能總結這兩年她的心情？她謂這兩年作出很多新嘗試，同時踏出了自己的舒適圈，「好多時候會感覺到自己好似企咗喺懸崖邊，憑着信心去跳出一大步，所以最終揀咗呢個碟名《Leap Of Faith》，直接翻譯就係『信心的跳躍』，作為呢兩年來一個總結。」大集收錄Gin過去兩年推出的作品，問到最喜歡的一首？她指是跟大碟同日推出、今年首支派台作品《無愧於當初的我》，歌曲由馮穎琪作曲、周耀輝填詞，將得與失之間的比重重新審視，「首歌真係我好多嘅心情寫照，亦都好似俾自己一個交代！呢兩年幾嘅大膽、去鼓起勇氣，直到都做到有少少成績，到出呢隻碟，似係為呢一個階段嘅我，亦都為呢一隻碟，畫上一個好靚好圓滿嘅句號。」
今次大碟拍攝，亦請來一位「重量級」嘉賓合作，就是Gin飼養多年的愛貓「杏仁糊」，「因為隻碟有兩個大方向，一個係大家平時見到工作嘅我，但有另一面係大家見唔到，包括好多喜怒哀樂，亦都有一大部分我喺屋企嘅時間，『杏仁糊』就係陪我最多時間嘅一個重要角色，少咗佢就少咗個精髓。」雖然如此，但身為貓奴的Gin，亦先要請示主子「杏仁糊」意願，「膽粗粗邀請佢影相，話俾佢知呢隻碟對我嚟講好緊要，我好有誠意同佢講，好希望佢可以參與今次拍攝，我哋一齊留下一個美好回憶，我仲話『你生得咁靚，梗係要俾世人睇到你嘅靚樣啦』」，誠意加上出力讚美，最終成功。
向來跟動物拍攝有難度，Gin大讚『杏仁糊』拍攝當日相當專業及配合，「叫佢坐定定就坐定定、瞓喺度就瞓喺度，但身為一個咁有性格嘅貓貓嚟講，佢都好捍衛自己權益，影到咁上下，我哋都攞到我哋想要嘅嘢，想影多少少嘅時候，就feel到佢『夠鐘啦，我要收工啦』，咁我就會知道佢，已經覺得有少少唔耐煩，即刻攞佢嘅袋出嚟，『咁返屋企啦！』佢即刻自己行入去個袋度，急不及待想返屋企休息。」
Gin坦言，這次拍攝唱片封套是最開心、最輕鬆的一次，「一嚟有『杏仁糊』加持陪我，二嚟拍攝setting係一個屋企環境，冇一種工作感覺，我好輕鬆咁去呈現一個好舒服、好自在狀態，全部都記錄咗喺隻碟裏面！」
