由三年前參加真人騷《調教你男友》一炮而紅，現時Jeffrey魏浚笙工作範圍，已涉及劇集、電影、歌手和主持等身份，這段時間再加上連串新歌宣傳，他終於感受到分身不暇，身體響起了警號，「上個月，先飛去法國十幾日，再去荷蘭探親，緊接去日本跟Do姐拍節目，返香港留了兩日，再飛法國fashion week，然後再返香港拍戲，嘩！最難搞是時差，開工對住鏡頭時都頂到，拍完就成個人虛脫，一些小毛病開始出現，眼睛發炎、胃酸倒流，第一次覺得瞓八小時都冇乜力，開始正視問題，調教返生理時鐘，我現在開始食supplement了。」
早前Jeffrey與Do姐鄭裕玲拍攝旅遊節目，近年也成為獨立藝人的Do姐，也與Jeffrey分享意見，「Do姐是一位非常好的前輩，跟她去日本拍節目，拍了六日，大家有好多相處的時間，她會跟我分享以前在這一個行業，和現在的不同，她又給我一個電影清單，叫我學下演技，要學識睇劇本等等。」
今時今日，未必會有歌手願意自資百萬造音樂，坊間亦有傳聞指Jeffrey有幕後老闆，唔通又係古天樂？Jeffrey說：「有人以為背後有幫手、有老闆，但做歌手這條路，真的靠自己努力工作賺來的一分一毫，去追尋自己的夢想，老實講，獨立自己做係辛苦㗎，現在所有大小事務，都得我和經理人（女朋友）兩個人去handle，但就因為咁，無論結果是怎樣都冇得去怨，所有東西由自己去suffer，係好fair嘅一件事。」
Jeffrey以前亦曾經簽約公司，他認為自主性比一切都重要，「以前有簽過公司，但到頭來都冇乜幫助，自己想做的又未必做到，人哋想做嘅嘢，又未必係你自己想做，咁我覺得無謂夾硬合作。」入行以來，Jeffrey坦言的確有唱片公司接觸，但他始終都是選擇做獨立藝人，「的確有公司approach，真心要多謝大家欣賞，但係暫時都係自己想做住先。」
化妝、髮型：Blair Chan
場地：十八夢（銅鑼灣）