無綫劇集《下流上車族》自播出後贏盡收視及口碑，連帶演員同樣人氣急升，飾演車太的江美儀今日就為護理安老中介公司拍攝廣告搵真銀，自言酬勞不錯，她表示最開心是大家對劇集的支持，稍後的工作已排到明年四月，故未有時間飛返鄉下，「我好耐無返鄉下日本喇！好想去二世古滑雪，以前一年去幾次，但最近劇接劇，工作已排到明年四月，我經理人話，『吓，你仲想放假，你放唔夠呀？』其實我都只係想去四日三夜都好！」
由於劇集收視及口碑不錯，問到有否信心在頒獎禮上爭獎？「我覺得當晚點都要坐喺度，入場券都應該有，至於攞獎都要睇天時地利人和，不過好彩我拍擋係林敏驄，佢同話事嘅人咁friend，又係好兄弟，最佳劇集都應該有機會，暫時成套劇集都叫唔失禮，佢哋話國內豆瓣網，有一個星期重攞咗9.1分，係以全中國計，大家都知無得灌水，完全觀眾喜歡就投，既然外圍氣勢贏，相信公司都會有表示！」是否開拍續集？「你睇驄哥拍唔拍先講，佢成日神遊太空，而且佢又好忙，所以好多未知數，一切等公司安排。」