又名波仔的Boris（黃浚銘），2017年開設個人YouTube頻道，正式成為YouTuber，受到不少年青人歡迎！Boris亦曾於2019年參加ViuTV選秀真人騷《全民造星II》，50強止步，而近年Boris涉足導演界別，曾為許廷鏗、Lolly Talk、Jeremy李駿傑、Jaime張天穎等拍MV。
今年，是Boris成為YouTuber的第七年，能走到今日，他感激來自不同界別的觀眾一直以来支持，才令他成功開拓屬於自己的一片天。為了答謝支持，Boris日前包了場，請近500位fans齊齊欣賞動畫《我的英雄學院：You’re Next》，Boris說：「成日都諗有啲乜嘢可以報答佢哋？自己又好驚搞fans meeting，因為好驚要唱歌跳舞！當我見到呢個劇場版上映嘅時候，突然冒起『假如我包一場優先場，會唔會有可能呢？』，假如我請所有鍾意《我的英雄學院》嘅觀眾，一齊迎接佢漫畫嘅完結，一定會係一件好感動嘅事，亦都會係我有史以來，做過最大型嘅觀眾見面活動！」
舉辦這個活動，Boris分外緊張，因為他從未試過召集過這麼多位觀眾，「好驚自己有任何出錯，令到活動唔順利，臨正式行入戲院見大家嗰一刻，我非常緊張，腦海閃過好多唔同畫面，但當我行入去，見到大家咁興奮，令我即刻安定落嚟！」Boris難忘當他行上樓梯，大家很熱情地跟他握手的場面，「當我坐喺戲院正中有一種好溫暖、俾大家包圍住嘅感覺，加上今次嚟嘅觀眾，都係支持咗我好多年嘅人，嗰個感受係陌生但又好親切，每一個觀眾同我傾偈，我都有問佢開唔開心？佢哋嘅感受，比我更加重要。」
《我的英雄學院》是Boris於十年前已開始追看的動漫，當時他只有14歲，今次，請fans睇戲是一齊看《我的英雄學院》的劇場版，對Boris來說分外有意義，「去到今日，呢部漫畫嘅完結，呢個劇場版有機會係呢部動漫最後一套劇場版，以後可能冇得再喺戲院睇到，所以我決定邀請所有同我一樣鍾意《我的英雄學院》嘅觀眾，一齊迎接佢嘅結束。」
動漫中的主角綠谷出久，是一個天生無能力但又很想成為英雄的人，他的性格真誠、內心強大，對Boris一直影響深遠，「佢嘅信念陪伴我行過好多次低潮，我希望將來都可以成為一個好似佢咁嘅人，所以呢部動漫嘅存在，對我嚟講非常重要。」Boris想跟fans們分享自己喜愛的事，因為他覺得，可以跟fans有共同喜歡的東西，是一件很幸福的事。
