葉振棠及方伊琪今日（8日）為二月舉行《電視經典金曲情演唱會2025》舉行記者會，棠哥葉振棠去年在紅館舉行演唱會後封咪，但他表示聽從醫生建議繼續唱，「醫生話叫我唔好停，好多Fans都仲想聽我唱歌，其實唱歌對我嚟講係好開心，今年我81歲狀態都仲咁好，醫生話都係唱歌。不過再唱都唔會再唱紅館喇，最多唱文化中心，紅館還咗心願就算，又可以同歌迷近距離接觸，依家唱歌最重要無壓力。」棠哥表示每日都會練歌保持狀態，「我每日會練歌兩，三小時，所以隨時都已經準備好，但依家做唔到咩運動，十年前都仲可以跑步，依家唔得，只可以慢步。」
今次方伊琪仔仔謝卓達更會與棠哥合唱經典劇集歌《難為正邪定分界》，她說：「多謝棠哥俾機會仔仔一齊合唱，今次佢負責魔鬼嗰段，我哋今次以電視經典金曲為主，當年大家電視撈飯，都想帶俾大家好多回憶，我會揀啲無綫劇集歌曲，同唱男仔歌比較多。」
更多現場圖輯：
