江嘉敏連日在IG分享捧着大束鮮花的照片，今早愚人節更在家門再次收到99枝玫瑰花，送花人謎一樣未現身，她今日（1日）出席活動時，被記者問到收花心情，她說：「我真係唔知，都好多懷疑，可能有人整蠱我，我有上網睇4月1日送花咩意思，答案都係整蠱，亦可能送錯門口，因為好多人都知我地址。（緋聞富貴醫生？）我都有問係咪佢，我話請我食飯仲好，但佢話唔係，其實邊個送就認咗去喇，等我可以講聲多謝都好！（醫生會否呷醋？）點解會？唔好亂寫呀，如果係真先好講，係一齊我會話俾大家聽，咁未係嘛，大家交流下，等我目前努力工作先，最重要有自己事業，感情隨緣，無得勉強，我𠵱家係單身。」
回復自由身的她近日又接商演及演出舞台劇，她自言相當充實，「嚟緊準備參演舞台劇，都要操fit，今次客串4場，練習中，好多參演者都有跳舞底子，反而我係一張白紙，又要唱歌、跳舞及演戲，所以要加倍努力，今次都要唱十幾分鐘歌，我當然話自己唱得喇，所以都有壓力，因為未曾試過演舞台劇，但好多身邊舞台劇人都好好，話叫我當舞會咁去做就可以，我都有問攞啲片段返屋企睇嚟練。」
更多現場圖輯：
