由阮兆祥、梅小惠、江欣燕合作拍攝的無綫節目《友乜唔講得》，今晚（30日）播出的第八集，請來陶大宇擔任嘉賓。
已有十五年沒有參演無綫劇集的大宇，近年依然是網絡人氣指標，除了經典「掩額頭」動作及「車匙（Jessie）」另類發音廣傳至今、大宇的「獨特歌喉」亦隨著《倒轉地球》遭熱議至今。大宇將在節目中逐一拆解創下的「網絡經典」，其中「掩額頭」動作的起源，是因為當年在劇集《心花放》的角色平平無奇，大宇於是自創小動作突出角色，「呢個我係刻意擺上去，等於賭神一偷雞就摸戒指一樣，又或者發哥以前嘅『係咁先』。因為劇入面個角色冇嘢做㗎，做啲嘢好濕碎，冇乜戲好演、冇性格，我就心諗不如加啲小動作，將我嘅喜怒哀樂都擺喺呢個動作度。」大宇還即場示範了「掩額頭」各種「情緒演繹」，當中包括「短速版」及「延長版」，相當爆笑。大宇最難忘是有一名有心網民，竟將他在劇集中第一集至三十集的掩頭面動作全部截圖，令他嘆為觀止。
第十期藝訓班畢業的大宇在演戲設計的靈感，原來是受發哥啟發，他笑言當年上堂的教材，不是周潤發就是鄭裕玲，「嗰時啲教材全部係發哥嘟姐㗎，《上海灘》、《網中人》咁，所以嗰時洗晒腦㗎，個個同學都以為自己係鄭裕玲同周潤發。」他當時很羨慕比自己早出道、而又已經備受力捧的「無綫五虎」，就連「登台最賺錢」的覺悟，也是源自五虎，「其實唱歌係為咗搵食㗎啫。嗰時好興登台，見到五虎登完台就換車好羨慕咯。所以做藝人個袋入面一定要袋住幾首歌，將來有機會時就有得用。」
談到大宇歌喉備受爭議，梅小惠馬上幫口，「佢每場show都好認真去唱㗎，佢係小事大做，大事更加落力嘅人。」大宇聞言和應：「其實我係賣力嘅，第一我收緊錢啦，我做事要對得住自己，就算下面點笑我、點挖苦我，甚至乎鍾意我都好，我都係要咁做㗎啦，你收得人錢又要hea住做，呢個唔係我咯。」談到唱歌，欣欣分享了一段因被噓匿入後台痛哭的往事，並透露當時全靠張學友安慰，「嗰時新秀出嚟做show，我因為隱形眼鏡乾係咁眨眼，人哋以為我姣婆呀！我就谷住泡淚入後台，好彩撞到學友，佢話：『姑娘仔，唔好喊啦，唔噓唔大㗎』。」
至於第三個熱話傳說「車匙」，大宇除將親口拆解是「故意」還是「意外」，還會大談與女主角郭可盈的深厚緣分，以及拍攝《刑事偵緝檔案》的辛酸史。率性的大宇，還會大方分享母親「零壓力」的教育方法，如何令他能夠在娛樂圈中捱出頭來。
