跑步如人生,保錡說:「自律!總之一定要學識自律,一點一滴累積所有嘢!」由做茄喱啡等運到、之後《造星》組團發圍、再到三角戀風波衰過又起返,一步一腳印,保錡發現以往原來「輸咗俾自己」,「俾咗好多藉口自己,依家可以話俾人聽,其實人生靠努力。唔好要求人哋俾到咩你,要求自己俾咗咩自己先!」難得認真不搞笑的保錡說。
有人肯定,不過保錡卻自嘲是「半紅不黑」藝人,「你又唔係劉德華、郭富城咁叻仔,又唔係張家輝,佢哋呢啲真係好勁,演技超勁跳舞超勁。我自己係學習階段,我只想睇下有冇一日,我會成為某個項目特別勁嘅一個artist,所以依家發掘緊自己,邊一樣嘢係最叻!」要數近期最叻,非跑步莫屬。講起跑步就精神的保錡說:「跑步就係你唔會無啦啦一步登天,變咗保特(短跑飛人)咁勁,真係要每日不停訓練,要提醒自己飲食各方面。當你每日去跑步,你會犧牲去玩樂應酬,每日會跟住個課題去跑。最大改變係我依家,每日起身都好精神,你會感覺到,尤其是娛樂圈,好多人都係講多過做,好多social嘅人,你會盡量減少啲同人social,因為你知道自己時間唔夠用。我依家三十幾歲,加埋做運動、返工、練跑,基本上已經冇時間,邊樣嘢最重要,我覺得事業係我最重要嘅嘢;第二件事就係,我想成為一個用生命感染生命嘅人,我不停去練習,證明俾人睇,原來我努力可以改變到自己,我想做呢件事。」
唔係每個人都係聖人
努力之餘,堅持不放棄亦是保錡的重要課題。新歌《Echo My Heart》就藉跑步領悟而創作,「資質不夠小說話(歌詞),依家有好多人跑,有啲唔想練習嘅人,佢哋都會有好多藉口,今日病呀、唔舒服呀、今日隻腳攰呀,原來問題就係輸咗俾自己。我覺得呢首歌可以話俾人聽,其實人生係靠努力,靠自己一步一步,唔好要求人哋俾到咩你,要求自己俾咗咩自己先,呢個係最緊要囉!」
由始至終,最想成為一個歌手,保錡真心鍾意唱歌,他說雖然很多人都認定他只是個「搞笑綜藝咖」,「以前啱啱出道食下魚眼食下辣,叫你跳下Bungy Jump跟住又喊,全部人睇你都覺得你食辣同埋食魚眼囉!佢唔會理解你個夢想係咩本質,我唔知自己搞笑係為咩!我拍戲係想做張家輝,做張家輝前期嗰啲搞笑片,因為我好鍾意氹人開心,人哋開心我都有成就感。音樂方面我真係好想喺台上面唱歌表演,我細個鍾意古巨基、吳浩康呢啲歌手,我成日諗有冇機會入到英皇,所以我參加過兩次英皇新秀比賽,都冇入過圍失敗咗,初賽已經俾人叮走!你知唔知《全民造星》,係我人生第一次入圍嘅音樂比賽。」
一世都唔好再諗入行
一個《造星》節目,改變保錡人生。最近新一屆《造星》又開播,保錡說除了自己有份參加的第一屆,其他每屆都沒有時間收睇,「絕對冇睇!因為我已經係一個綜藝咖,呢幾年主要做綜藝節目多,冇乜時間睇電視!我感恩自己有參加過,大膽一嘢衝過去就參加,冇諗過自己之後可以咁樣,從來唔知未來會發生咩事!我唔做茄喱啡,我同自己講過,我26歲嗰年參加比賽,如果我再入唔到行,我直接唔做,唔好喺度磨,因為26歲入行,已經係好差唔多㗎喇,入唔到就唔好入,我拚咗最後個生命去。我同自己講過,如果呢個比賽入唔到行,就一世都唔好再想入呢行!」
追夢成功,但距離夢想有幾遠?32歲保錡說:「到咗㗎喇!跟住全部都係感恩,每日都係恩賜,上天俾我嘅,本身見到張家輝(終極偶像), 我淨係可以喺電視或者電影院見到張家輝,但係我依家可以見到真人喎,你又會無啦啦喺電視度見到自己個樣喎,電影無啦啦又會有吳保錡呢個人,全部都已經多咗!我已經好感恩!」
目前最想專注跑步與唱歌,拍拖暫時放一邊,「因為冇晒時間,練跑加拍嘢加造歌,邊有時間諗咁多嘢!我唔想拍拖呀,練咗跑之後,有時睇鹹片都冇時間,以前都鍾意睇鹹片,個個男人都鍾意,不過依家練咗跑,其實你都攰到費事睇!」保錡補充,文雅一點的說法,是「日本藝術動作片」才對。
化妝:Cori Wong @Annie G. Chan Makeup Center
髮型:Harris Lai @CHIC Private I salon
Man Chan @CHIC Private I salon
服裝:432hz
場地提供:十八夢(銅鑼灣)