許廷鏗（Alfred）與吳林峰將於11月18日舉行《Music From Home 許廷鏗 X 吳林峰音樂會》，今次他們希望借音樂會主題帶出另一種家的體會。Alfred說：「近年因為疫情關係，好多朋友離開咗呢個地方，亦有可能有人計劃緊飛走。我想將屋企定義拉闊啲，希望當晚入嚟睇嘅觀眾諗住『咩係屋企？』，然後透過我哋嘅歌曲會有唔同嘅體會。」
吳林峰今次更要克服「童年陰影」，他透露在求學時期曾選唱Alfred的金曲《螞蟻》參加歌唱比賽，怎料被歌唱老師叮出局：「我有次係K房唱完《螞蟻》，好多朋友都話好聽，話我把聲好似Alfred，我就自信滿滿揀咗呢首歌去參加比賽！點知最後唔係輸咗咁簡單，係入唔到圍呀，自此之後我就好唔鍾意呢首歌，哈哈！」吳林峰更預告將會在音樂會上、在原唱面前，重新挑戰這首歌，更邀請了當年把他淘汰的歌唱老師入場，誓要一雪前恥！Alfred與吳林峰今次為音樂會聯手炮製新歌，由吳林峰作曲、Alfred填詞，並在音樂會上首次公開演唱。吳林峰坦言一直渴望寫一首歌與對方合唱，希望「借歌敬fred」來感謝這位伯樂！他說：「真係好多謝佢俾咗好多力量我，如果當時Alfred冇用到我首歌《雪糕》，可能我冇動力再寫落去，我會選擇去做社工，同小朋友唱吓歌就算。所以對於努力緊嘅人嚟講，一份信任真係好重要。 」
Alfred又憶述當日計劃自組公司時，吳林峰第一時間不計酬勞，自薦為他寫歌。他說：「吳林峰嘅存在令我冇咁孤單，呢份情義令我有陪伴嘅感覺，所以你我之間好難計算。」他還感觸表示，當日吳林峰在頒獎台上獲作曲人大獎時，花了很大篇幅來答謝他：「仲記得我當時已經喊到不似人形，坦白講佢成日覺得我好，但調轉返，一個等咗咁多年、咁重要嘅獎，佢第一個多謝嘅唔係自己、唔係屋企人，而係多謝我。我覺得係一件好無私嘅事，所以我真係好感動，可能呢個亦係我咁錫佢嘅原因。」
