吳業坤早前在社交平台發起投票：「半紅不黑係好定唔好」，除了有「好」及「唔好」兩個選項，還設有第三選項：「收皮啦」，合共收到1205票，「收皮啦」一項得票最多，佔43％。坤哥後來出席活動曾回應這事，他笑說本想透過遊戲互動，測試網民有幾mean？結果發現大家真的好mean，即將與胡鴻鈞合體開騷的他，直言信心沒有因此被打擊到。
昨日（29日）坤哥在社交平台為這次投票作出總結，他表示過去兩、三年埋首密密唱歌拍劇，不過，可能大家沒有留意，所以在街上經常遇到有人問他何時出歌？他亦沒有像以往在網上發表太多言論，只是最近有少少衝動，因而發起這個投票，他寫道：「想喺度講個總結：做呢行（或者任何一行）紅唔紅、黑唔黑，我覺得唔係重點，自己喜歡嘅事可以成為職業，唔係好足夠啦咩？係咪每個人做到最Top先可以被尊重，堅持住自己想做嘅事去不斷進步，已經十分難得，有幾多人講多過做，然後怨天怨地，唔係個個一出黎就會成功，成功過又唔代表唔會跌低，跌低完其實又可以起身繼續行，唔好相信人地對你自己嘅否定，向着你夢想嘅畫面繼續行就好了，有人聽我唱歌我好滿足㗎啦！共勉之！」
坤哥透露近年沒有像以往在網上發表太多言論，但他仍不時在社交平台發布帖文，包括學習空手道、與太太到瑞士旅遊、睇時裝表演、出席歌迷為他舉行的生日會等等，生活相當充實。
圖片來源：吳業坤@instagram
