蕭正楠（阿蕭）與吳若希（Jinny）今日為無綫劇集《奔跑吧！勇敢的女人們》宣傳，阿蕭指太太黃翠如每集也有追看，由於劇中自己的角色會變得更渣男，所以已向老婆作心理輔導：「自己都怕佢睇完情緒有波動，所以不斷同佢講呢套係笑片，都係拍劇。（是否對太太女王式服侍？）一向都係，不過𠵱家就變咗有兩個人受惠，算着數咗。」由於未向外公布BB性別，他表示只有他、翠如和醫生知道，但就決定交由太太公開，問到會否在頒獎禮獲獎時趁機公開？「好似唔關事。（但你當年在頒獎禮公開結婚。）原來你哋對我咁有信心，睇好我上台攞獎呀。」
至於吳若希自認今年頒獎禮只是陪跑：「我唔係做得好好，但又唔係好差，希望陪跑都可以跑出好成績，就好似套劇咁有好收視，所以今日公司都安排咗花車巡遊，證明對套劇成績都好滿意。」今日活動上更現場公布劇集7天跨平台總收視有21.3點，成績不俗。
