跟車主了解完車輛性能後,家怡與Gladys急不及待上車「走返轉」,二人大讚「好玩、好正」,Gladys表示以前對這種車有誤解,「成日覺得坐呢啲車會好chok,但依家又坐得幾舒服喎!」家怡則謂以前玩賽車game時,經常見到這款車,亦會選用這車作賽,「成日鏟上壆、撞埋牆,我成日覺得好難控制,但原來其實又唔係好難揸咋喎!油門同剎車嘅高度啱啱好、踭趾一流,可以放心踏,唔覺得佢有好難駕馭感覺。」最後更大叫「棍波車好好玩呀!」不過提到棍波車,家怡坦言有陰影,「試過泊咗架棍波車喺條斜坡,去完個friend屋企之後去攞車,架車唔見咗!原來流咗落去斜坡下面,好彩冇撞到人!其實個hand break我已經抽到好高,到最後check咗都係hand break老化,好驚呀!有陰影呀!以後揸棍波車一去斜路就入定個一波先。」
家怡則自爆自己小時候十分討人厭,「去食大排檔,我會突然間無端端扮作嘔『我想嘔呀』,見到坑渠邊我又會扮作嘔,所以我細個真係好乞人憎㗎!自己彈琴嘅時候,我啲阿哥喺度玩,我就會話『爹哋,佢哋好嘈呀』,我真係八婆嚟㗎,公主到不得了!」直到中三才沒有那麼討人厭,「上咗中學都好啲,但我嗰陣時都唔可以喺街度屙屎,我意思係唔可以喺街嘅洗手間便便。」話題一轉,二人熱烈地討論如廁話題,原來Gladys到現在亦不能在外「開大」,「要好急先得!」家怡就問到拍戲時如何解決,Gladys直言:「所以我拍親都便秘,同埋有時地方好細,化妝間同廁所就喺隔離,我真係屙唔到,會聽到㗎嘛,哈哈!我諗起一單好搞笑嘅嘢,話說我去camping食好多嘢,但嗰個廁所好惡劣,又黑又濕剩係得個窿,好易差錯腳,我哋喺草地有好多牛,跟住我就喺度諗:『喺啲牛屎隔離屙應該唔係好覺嘅』,哈哈,我個friend就同我講:『牛屎咁大篤,人屎咁細,聽日天光就會見到……』我最後都冇屙到,我要事先聲明。」
聽完Gladys分享後,家怡即刻話:「我哋究竟講緊啲乜嘢,我覺得《恨駕女團》不停挑戰觀眾口味,哈哈!」不過隨後她又忍不住分享,「依家拍戲通常book好晒有流動廁所,嗰陣時去泰國拍《無雙》,嗰個廁所真係好靚,佢哋book咗一架專for拍戲嘅廁所。」