周家怡為張敬軒半裸拍MV 「第一次拍咁激烈嘅牀戲」

男歌手張敬軒昨日（7日）推出了收錄17首歌的大碟《The Brightest Darkness》，更找來周家怡和黃德斌拍攝MV，而周家怡在MV《俏郎君》甚至有半裸演出。

MV以電影模式製作，拍出一段是否經歷過生死，便可終身到老的愛情。雖然軒仔未有於MV出現，但拍攝MV的兩日中，他全程都在現場，親自監督每一場戲。MV中，家怡跟德斌有一場激烈牀戲，家怡半裸上陣，露出白滑玉背，連她自己都話好激，「唔係熒幕初吻，亦都唔係第一次拍床戲，不過就係第一次拍咁激烈嘅床戲，而家剪咗出嚟睇落都唔算係好激烈，其實拍攝當日都幾激烈。」由於以往經常合作，二人已經十分熟落，他們都認為拍攝親熱戲最重要互相信任，「因為大家都已經好熟，會好相信對方，可以好放心咁拍。」

不過家怡卻表示有點尷尬，「啱啱開始排戲嘅時候，我真係忍唔到笑，真係太熟啦，佢都忍唔到笑，嗰個位就會有少少尷尬，都幾得意。」不過尷尬同時，家怡表示其實這幕親熱戲令她十分感動，「嗰種感動係嚟自當一對情侶嘅關係中間有啲隔幕嘅時候，可能就係得嗰一個moment個女仔先可以真係好感受到大家連繫嘅嗰份愛，拍緊嘅時候有呢一種感覺。我記得拍緊當日，導演睇playback時都有講雖然係一場親熱戲，但有種悲哀感覺，我拍緊同睇playback嘅時候都有一種咁樣嘅感覺。」

首次與軒仔合作，家怡大讚他是貼心暖男，「雖然軒仔冇喺mv演出，但拍攝嗰兩日其實佢都喺度，開咗好多次會，佢對個角色嘅心路歷程都好了解，俾到一啲好有用嘅advice，甚至乎令到成件事更豐富。至於照顧團隊方面，佢更加係無微不至，對所有人都好take care，take care我哋飲食、驚我哋冷親，所以好開心同佢合作，亦都好開心認識到佢。」