周永恒曾因婚後偷食及家暴趙頌茹，被封「世紀賤男」，他亦自認「人渣」；他於2018年與趙頌茹離婚後，旋即與內地女友陳薇結婚，同年誕下一子。近年，他的感情生活轉為低調，未料最近卻傳出被老婆陳薇家暴，其友人更公開數張周永恒傷痕纍纍的照片，力數陳薇不是，為他討回公道！
香港填詞人因葵（陸遜遊）近日在社交平台發文，又公開數張周永恒傷痕纍纍的照片，表示：「無論你哋認唔認得圖中男主角，你哋覺得佢係乜嘢人唔重要，清官難審家庭事，但一個女人可以不停講大話，誣衊佢老公，仲要四圍唱俾佢老公啲朋友聽，話佢老公打老婆，呢堆相，whatsapp cap圖內容係今晚人哋老婆同我嘅對話，其他受傷照片，係佢老公早前入醫院嘅證據，仲要係個老公啱啱做完腦部手術，情緒病續漸好轉嘅時候，到個老婆發神經，其實有暴力傾向係個女人。」
因葵認為外間一直對周永恒有負面標籤，但他認識的周永恒卻不是如此不堪，「或者有人會覺得抵死，但呢個朋友，我用咗超過三年時間同佢相處，你唔會估到佢其實係點，喺你哋眼中佢只係八卦新聞一則，但我見到佢今晚含冤入獄，我實在忍唔住，我同佢之間一直研究宗教哲學健身音樂創作，佢的而且確曾經係有情緒病，但佢做咗腦科手術之後，係愈嚟愈進步，以前佢會喺我面前發洩情緒，而家同我傾嘅係佛偈，一個耶穌仔可以同我傾佛偈，如果佢真係呃我嘅，抵啦！唔好計佢以前自己私生活係點，呢一個世侄唔只係朋友咁簡單，佢可能係第一個令我發現自己有乜嘢弱點，令我進步嘅人，我曾經帶過佢去彼岸，然後又回到俗世。」
周永恒被老婆家暴的消息，昨日（21日）開始在網上發酵，被指家暴老公的陳薇在社交平台連發三則帖文，疑似回應家暴事件，更暗指有人想博出位，「呢個荒謬嘅世界想紅想出位嘅人就可以出賣靈魂，完全冇良知可言？」她表示不是事實的報導一律不作回覆，亦會考慮向相關未經她證實的新聞來源作出起訴。
