嚴淑明回來了。這位話題女王，過往的性感出位、全裸寫真、汶萊事件，連變性人傳聞都有，今年50歲「復出」剛剛過生日，嚴淑明說這次再出發，很開心可以真正做自己，不再是過去為公司、為市場、為記者而活，搞盡腦汁博版面做扯線公仔，不過，她依然感恩有「話題女王」呢個朵，「原來我同期十幾個，得返我一個剩餘喺度！每一個娛樂新聞都造就咗今日嘅我！」
重新上路，女王已成人妻，與圈外老公秘婚5年。回望演藝之路，嚴淑明最難忘經歷4年冇工開的日子，要靠變賣珠寶首飾應急。
最近到台灣宣傳，嚴淑明不改話題女王本色，除了自爆秘婚5年外，她與知名主持利菁在直播期間提及李玟（CoCo），事後卻被甄妮在網上怒批「若帶貨要靠出賣朋友，耍陰招做生意而得呈（逞），也是可憐！」嚴淑明說：「我當時冇回應呢件事，不過你今日問起我，我唔介意講。其實第二日之後，我話死喇，我電話未停過，我話大鑊點算好呀？我哋唔好回應，忍住啦，但我想講，我哋出發點唔係去消費邊個邊個，其實冇專利權，唔係得你有專利去幫邊個講嘢，因為件事好簡單，人走茶涼，冇人再講就冇人再care Coco受咗啲咩問題！」
重提「全裸」行紅地毯
說起李玟，嚴淑明忘不了這一幕，「我同佢一啲都唔熟，但係CoCo係一個好溫暖嘅人，因為我同佢都係喺台灣開始演藝事業。我記得有一次倒數活動，CoCo唱完，佢特登走埋嚟捉住我隻手，同我講『加油加油，你好叻呀！你同我一樣都喺香港過嚟，我有留意你呀，你加油加油，祝福你』，我好記得呢一幕！」嚴淑明好早期已經到大陸發展，說到真人騷的黑幕，話題女王說：「我嗰陣時冇咁複雜，依家因為大家都知道要搵大陸錢，不過講真，我隨緣㗎咋，我唔會因為你俾錢多，我好似一隻汪汪狗汪汪汪，我唔需要做呢啲嘢！我唔鍾意有好多制度，好似依家呢個節目（《中國好聲音》），代表咗一個制度，但你要尊重人囉，我覺得CoCo應該值得尊重，我覺得嗰個人要出嚟道歉，股價跌都無用，你係要出嚟道歉！你有你節目制度，亦都要有一個人性制度，唔可以咁樣囉！」
嚴淑明有嗰句講嗰句，從來不負「話題女王」之名，不過她坦言過往的新聞，令她很辛苦，每次做完焦點人物，公司都對她說「你好好呀，好多人講你呀」，但她每次收工坐車回家，一上車就爆喊。食得鹹魚抵得渴，「唔可以講被迫，有時就算性感，我開頭都要說服自己，我係咪真係一個性感女神先？我性格咁爽朗，所以我會覺得自己當時好吃力，表面上冇人發現到，我做完嘢上保母車就喊，我喊唔係因為我被迫唔開心，而係我覺得好辛苦，我喊完冇嘢！依家你再見返我，呢個真係我做緊我自己，點解我話近呢十年好開心好舒服，我可以講自己想講嘅說話，唔使再因應以前好多市場需要、記者需要、觀眾需要，嗰樣嘢帶俾我可能好多金錢、好多機會，但某程度上我又會覺得好唔開心！今日再講返出嚟，我覺得有邊個做嘢係唔辛苦㗎？過程真係不足掛齒，唔需要掛喺嘴邊！」
說起經典的台灣金鐘獎紅地毯「全裸」戰衣，最後惹來「不請自來」風波，今天嚴淑明說起依然無悔，「當時主辦單位係東森電視，我打俾東森電視老闆黃先生，我哋識但唔係深交，我話有一套服裝意大利運咗返嚟，我話佢哋想俾我著，我一定要喺你哋紅地毯著，我話我想創造一個經典。你諗下一個咁大場合，所有spotlight射住你，但你全身都係鑽石，效果係好震撼！之後報道話不請自來，我唔開心咗成個星期，當時我冇得解釋呢件事，講多無謂食多會滯，硬啃咗佢啦，嗰個星期好唔開心，我打自己，真係打自己，我要用一樣嘢蓋過呢個痛，當然冇鎅手啦，我唔會『拉小提琴』，放心，我好自愛！我冇後悔過做呢件事，起碼金鐘獎每一次做回顧，一定會講返呢件事，都會出返嗰張相，係永久一個經典。」
話題女王都有受傷一刻，嚴淑明說最hurt她的是兩件事，「不請自來最hurt啦，汶萊事件都hurt㗎！心情好複雜，因為我始終入行，係因為呢單新聞入行，人哋認識咗呢個人！我委屈到講唔到出嚟，我咁細個點做淫媒啫？冇咁嘅能力啦，但過去咗都過去咗，有時我再諗返，其實我要感謝呢個新聞，令到我寫咗第一本書（講女星汶萊賣淫），令到我有一個契機去台灣發展。每一個娛樂新聞都造就咗今日嘅我，今日如果我可以做自己，我唔會再好似以前做一個扯線公仔，太善良喇，其實以前我嘅善良冇乜價值，因為全部用錯喺呢啲地方，依家我唔會啦，要比以前更加堅強、更加開心。」最誇張的變性人傳聞，嚴淑明話得啖笑，「呢個反而我覺得係個笑料，未去到唔開心，我最唔開心係不請自來同汶萊事件，呢兩樣嘢影響我比較大！」
人生最低潮的四年
早在十多年前，當微博仍未興起的時候，嚴淑明已經轉戰大陸市場發展，不過在11年遇上當時的大陸經理人為情自殺，殺她一個措手不及，之後的工作完全停擺，整整四年間零工作，「突然之間我經理人為情自殺，我好記得當晚佢自殺，當然好感恩佢冇事，依家佢都嫁得好好。過咗嗰晚我就飛返嚟香港，所有嘢停咗，唱片約冇人再繼續幫我跟，我冇諗過會停足足四年，我去到要將自己啲珠寶靚嘢，全部逐件逐件賣出去。我有一啲珠寶喺台灣買，我特登call返個珠寶商，坦白同佢講，我依家遇到一個難題，我需要將啲珠寶賣返俾你，佢好好，佢幫我用返我買個價錢，冇壓我價，佢仲留住我賣俾佢嘅留到依家，我好感恩！我嗰四年上網學嘢，開YouTube，跟住學點樣用Photoshop，我依家精修㗎，又學點樣剪片！嗰四年係我人生最開心嗰四年，亦都係我人生最低潮嗰四年！」不過，話題女王依然要有話題，「我記得我唯一做就係每半年，叫公關發個新聞稿，等啲人覺得我仲存在啫，發咩新聞稿呢，其實乜嘢都講下，俾個公關求其發下，我同佢講，因為我依家經歷緊一啲嘢，我只需要你每幾個月幫我發一條新聞稿，喺台灣穩住少少嘢，我話等我諗清楚未來點樣行條路先。」
絕處逢生，後來因為一個電話，她獲得一套中美合拍片的試鏡機會，由冼杞然執導、奧斯卡影帝Joseph Fiennes與大陸影星竇驍合演的《終極勝利》，結果一試成功，「我第一次參與電影已經咁大製作，我仲好記得幾個月之前先睇緊Joseph Fiennes嘅美劇，我點會諗到幾個月之後，會同佢出相入對九個月。人生係好奇怪，我冇諗過呢一個電話又改變返我。我好記得冼杞然拍完之後，其實拍成部戲咁耐以來，佢冇俾過我好面色，拍完之後有一日，佢捉住我同我講，佢話當初有人recommend你俾我，我完全唔想用你，因為嚴淑明呢個名實在太過棘手，我驚你參與我部電影，啲人焦點錯咗，後來我發現我冇用錯你，因為由劇組到主角到奧斯卡影帝到幕後，連啲阿姐都讚你，話你準時又肯幫人好捱得，我聽完之後我就喊囉！」
嚴淑明呢個名，的確棘手，與她秘婚5年的圈外老公，一起走來不易，「我另一半比較低調保守，佢屋企人都好保守，所以我冇刻意講（結婚）。佢好包容我，嚴淑明三個字棘手啲，我好感恩佢好包容，佢屋企人都好包容，所以我都好感謝。」活到半百，嚴淑明現在講得最多的字，感恩。
化妝：Gaby Makeup
髮型：Gaby Makeup、Hi-Tech Salon
場地提供：The Wall Street Bar & Lounge
